Bændur spyrja Jón Bjarnason um landbúnaðar­stefnu Jóhönnu gagnvart ESB

Það er talandi dæmi um stöðuna í ESB-aðildarviðræðum Íslands undir stjórn Össurar Skarphéðinssonar utanríkisráðherra að Bændasamtök Íslands hafi ritað bréf til Jóns Bjarnasonar, sjávarútvegs- og landbúnaðarráðherra, með tilmælum um að hann upplýsi hvaða samningsmarkmið í ESB-aðildarviðræðunum Jóhanna Sigurðardóttir forsætisráðherra kynnti Angelu Merkel, kanslara Þýskalands, á fundi þeirra í Berlín 11. júlí.

Í bréfi Bændasamtaka Íslands til Jóns Bjarnasonar af þessu tilefni segir meðal annars:

„Af fréttinni [um fundinn í Berlín] má ráða að forsætisráðherra hafi kynnt samningsmarkmið varðandi landbúnað en engin slík markmið hafa verið kynnt opinberlega á Íslandi. Sjávarútvegs- og landbúnaðarráðherra hefur hins vegar tekið undir lágmarkskröfur Bændasamtakanna sem ályktað var um á sl. Búnaðarþingi og kynnt þær fyrir ríkisstjórn. Bændasamtökin óska eftir því við yður af þessu tilefni að þér aflið upplýsinga um hvaða stefnumarkmið forsætisráðherra kynnti kanslaranum á áðurnefndum fundi þeirra.“

Þegar þetta er ritað hefur ekki verið skýrt frá svari Jóns Bjarnasonar við þessu bréfi frá bændasamtökunum. Ef marka má af fyrri reynslu kann að dragast nokkuð að ráðherra svari samtökunum þótt Jón sé ekki jafn ósvífinn gagnvart forystumönnum mikilvægra hagsmunasamstaka á starfssviði ráðuneytis síns og Guðbjartur Hannesson velferðarráðherra sem hefur látið formann Læknafélags Íslands bíða í sex mánuði eftir viðtali við sig.

Verði svar Jóns síðbúið verður vafalaust unnt að það með vísan til hins alkunna hroka Jóhönnu Sigurðardóttur í garð þeirra sem leggja fyrir hana óþægilegar spurningar. Hún hefur hvað eftir annað leitast við að skjóta sér undan að svara slíkum spurningum skýrt og skorinort. Hún vildi til dæmis ekki upplýsa hvaða kjör hún bauð Má Guðmundssyni í lokaþætti leikritsins sem sett var á svið við ráðningu hans í embætti seðlabankastjóra. Þá varð að klaga Jóhönnu til ríkisendurskoðunar vegna svara út af verktakagreiðslum ráðuneyta. Loks fer hún undan í flæmingi þegar reynt er að grafast fyrir um hvers vegna forsætisráðherra Kína og um 100 manna nefnd manna með honum hætti við að heimsækja landið.

Telja verður víst að Jón Bjarnason hafi þrek til að leggja spurningu Bændasamtaka Íslands fyrir forsætisráðherra. Hið einkennilega í málinu er þó fyrst og síðast að samtök bænda skuli beina spurningu til landbúnaðarráðherra sem snýst um hvað forsætisráðherra hafi sagt á fundi með kanslara Þýskalands um mál sem fellur stjórnskipulega og samkvæmt lögum um ráðherraábyrgð undir verksvið landbúnaðarráðherra sjálfs. Samtökin ganga að því sem vísu að Jóhanna hafi sagt annað en Jón.

Í aðdraganda bankahrunsins beittu ráðamenn innan Samfylkingarinnar markvisst þeirri aðferð að halda Björgvin G. Sigurðssyni bankamálaráðherra frá mikilvægum fundum um bankamál. Þeir komust upp með þetta í krafti flokksaga.

Nú er ástæða til að spyrja: Ætla vinstri-grænir að láta líðast að samfylkingarkonan Jóhanna Sigurðardóttir ýti landbúnaðarráðherra til hliðar þegar rætt er um landbúnaðarmál við ESB? Það er ekki aðeins brot gegn stjórnskipuninni heldur öllum hefðbundnum samstarfsháttum í ríkisstjórn.