ESB: Er að verða breyting á afstöðu Samfylkingar?

Er hugsanlegt að breyting sé að verða á afstöðu Samfylkingar til aðildarumsóknar Íslands að Evrópusambandinu? Það er ekki óhugsandi miðað við það, hvernig Jóhanna Sigurðardóttir, forsætisráðherra, talaði í samtali við AFP-fréttastofuna í fyrradag en þar viðurkenndi hún, að atburðirnir á evrusvæðinu gætu haft áhrif á stöðu málsins hér á Íslandi. Þannig hefur forsætisráðherra hins vegar ekki talað hér heima fyrir.

Þá er athyglisvert að sjá allt annan tón hjá Ingibjörgu Sólrúnu Gísladóttur, fyrrverandi formanni Samfylkingar um þessi mál en áður. Hún virðist gera sér glögga grein fyrir því hversu veikt það er að fara af stað með aðildarumsóknina með klofinn stjórnarmeirihluta að baki og hún virðist líka gera sér grein fyrir því, að uppnámið á evrusvæðinu hljóti að hafa áhrif á afstöðu Íslendinga og málið allt.

Hins vegar má vera, að afstaða Ingibjargar Sólrúnar segi í sjálfu sér enga sögu um viðhorf innan hennar gamla flokks. Er hugsanlegt að Ingibjörg Sólrún sé á leið út úr Samfylkingunni? Er hugsanlegt að Ingibjörg Sólrún sé komin í andstöðu við ríkisstjórnina? Það er ekki að sjá að miklir kærleikar séu á milli hennar og fyrrverandi samstarfsmanna hennar innan flokksins.

En jafnvel þótt svo væri, að fyrrverandi utanríkisráðherra væri á leið út úr sínum gamla flokki, fer ekki á milli mála að hún gegndi lykilhlutverki í því að koma aðildarumsókninni að ESB á dagskrá hér. Afstaða hennar nú veikir því augljóslega þá hreyfingu innan og utan Samfylkingar, sem berst fyrir aðildarumsókn að ESB. Ingibjörg Sólrún notar í raun sömu rök og við, sem andvígir erum aðild höfum notað undanfarna mánuði og misseri. Hún vísar til klofnings í stjórnarliðinu í afstöðu til málsins og hún vísar til ástandsins á evrusvæðinu. Að því leyti til má segja, að Ingibjörg Sólrún sé orðinn bandamaður andstæðinga aðildar þótt ekki skuli dregið í efa að langtímasjónarmið hennar í málinu séu óbreytt.

Hér er hins vegar um svo veigamikla breytingu að ræða á því, hvernig þær báðar, Jóhanna og Ingibjörg Sólrún, tala um þetta veigamikla mál að full ástæða er til að láta á það reyna með einhverjum hætti, hvort hugur fylgi máli.

Eins og vakin hefur verið athygli á hér á Evrópuvaktinni gæti það breytt miklu um þróun stjórnmála hér í nálægri framtíð ef svo væri.