Yfirlýsing Þorgerðar Katrínar er lykilatriði

Stjórnmálafræðingar Samfylkingarinnar eru að sjálfsögðu komnir af stað með skýringar á niðurstöðum landsfundar Sjálfstæðisflokksins í málefnum Íslands og Evrópusambandsins og finnst ekki mikið til koma. Þó virðist eitt grundvallaratriði hafa farið fram hjá þeim.

Þorgerður Katrín Gunnarsdóttir, fyrrum ráðherra og fyrrum varaformaður Sjálfstæðisflokksins hefur lengi verið einn helzti forystumaður aðildarsinna innan Sjálfstæðisflokksins. Á landsfundinum lýsti hún yfir stuðningi við þá tillögu, sem samþykkt var um að hlé skyldi gert á viðræðum við ESB um aðild Íslands og þær ekki teknar upp aftur fyrr en að lokinni þjóðaratkvæðagreiðslu og þá að sjálfsögðu með þeim fyrirvara að slíkt yrði samþykkt í slíkri atkvæðagreiðslu. Þorgerður Katrín kvaðst lýsa yfir stuðningi við tillöguna með semingi en engu að síður er það staðreynd, að hún lýsti yfir slíkum stuðningi.

Þetta er auðvitað grundvallatatriði að því er varðar afstöðu aðildarsinna innan Sjálfstæðisflokksins. Með ummælum sínum hefur Þorgerður Katrín fallizt á, að gert skuli hlé á viðræðunum og jafnframt að þær verði ekki teknar upp að nýju nema þjóðin sjálf taki ákvörðun um það.

Þessi afstaða Þorgerðar Katrínar er mjög mikilvægi. Þorsteinn Pálsson hefur í greinaskrifum sínum í Fréttablaðinu talað dálítið í sömu átt, þar sem hann hefur sett fram þá skoðun, að óhugsandi sé að aðildarviðræðum verði lokið og þjóðaratkvæðagreiðsla fari fram um samning fyrir þingkosningarnar 2013 eins og Jóhanna Sigurðardóttir lýsti yfir að hún stefndi að á landsfundi Samfylkingar í október.

Í raun og veru eru þau Þorgerður Katrín og Þorsteinn Pálsson að staðfesta það, sem við blasir að ríkisstjórnin hefur klúðrað aðildarumsóknini svo gersamlega að hún er andvana fædd að óbreyttu. Það er alveg ljóst að ráðamenn í Evrópu botna ekkert í því hvernig forystumenn ríkisstjórnar Íslands haga sér í þessu máli og þeim er auðvitað vel ljóst hver staðan er hér á landi.

Þetta lykilatriði fer hins vegar fram hjá stjórnmálafræðingum Samfylkingarinnar eins og við er að búast. Þeir eru að leggja flokkspólitískt mat samfylkingarmanna á niðurstöður landsfundar Sjálfstæðisflokksins en ekki hlutlægt mat fræðimanna.