Nú reyna allir að ná í peninga Þjóðverja

Nú snúast átökin í Evrulandi fyrst og fremst um það að hafa peninga út úr Þjóðverjum. Fjármálamarkaðir gera dag hvern kröfu á hendur Þjóðverjum um aðgerðir, sem allar hafa það að markmiði að bæta stöðu og hag fjármálafyrirtækjanna. Þeir einu, sem eiga peninga í Evrulandi eru Þjóðverjar og þess vegna beinast allar kröfur að þeim.

Ríkisstjórnir í öðrum evrulöndum beina líka spjótum sínum að Þjóðverjum og þar er sama sagan. Þær eru að reyna að hafa peninga út úr þeim af því að þeir eru þeir einu, sem eiga peninga. Þetta fyrirbæri þekkist úr mannlífinu að öðru leyti.

Angela Merkel er hins vegar föst fyrir og stendur fast gegn allri ásókn í peninga Þjóðverja. Hún neitar að samþykkja að Seðlabanki Evrópu setji prentvélarnar af stað og hún neitar að gangast í ábyrgðir fyrir skuldabréfaútgáfu allra annarra evruríkja.

Þetta þýðir að átökin í Evrulandi eru orðin mjög djúpstæð eins og átök um peninga verða alltaf. Það er engin lausn að finnast á þessum deilum vegna þess að hún er vart finnanleg. Þjóðverjar vilja gera breytingar á sáttmálum ESB. Til hvers? Til þess að tryggja að það hafi afleiðingar ef einstök aðildarríki evrunnar standi ekki við sitt. Og afleiðingarnar eru í raun svipting á fjárræði þeirra ríkja, sem fara yfir strikið. Þau taka slíkum hugmyndum misjafnlega vel.

Á sama tíma og Evruland logar í illdeilum sendir Brussel hvern manninn á fætur öðrum til Íslands til þess að uppfræða okkur Íslendinga um hvað allt sé gott í Evrulandi.

Ætli þeir haldi að Íslendingar fylgist ekki með fréttum frá hinum stóra heimi!