ASÍ ætti að horfa til Grikklands, Írlands og Spánar

Alþýðusamband Íslands efnir nú reglulega til funda um íslenzku krónuna, evruna og aðra gjaldmiðla og veltir upp þeirri spurningu, hvaða valkosti við eigum í gjaldmiðilsmálum. Að sjálfsögðu er ekkert nema allt gott um slíkar umræður að segja svo lengi, sem þær snúast um að upplýsa og fræða en ekki um trúboð, sem of mikið hefur borið á af hálfu Alþýðusambandsins.

Hins vegar fer minna fyrir því, að þessi heildarsamtök verkalýðsins á Íslandi haldi uppi reglulegri upplýsingastarfsemi um atvinnuástandið í þeim evruríkjum, sem verst standa um þessar mundir. Þó er það harður veruleiki, að atvinnuleysi í sumum þessara ríkja eins og t.d. í Grikklandi og á Spáni er gífurlegt og allt að því óbærilegt í röðum ungs fólks en í báðum þessum löndum er um helmingur fólks innan við 25 ára aldurs án atvinnu.

Ekki tekur betra við, þegar horft er til annarra aðildarríkja myntbandalagsins. Hér á Evrópuvaktinni í dag er sagt frá því að yfirgnæfandi meirihluti fyrirtækja á Írlandi stefnir að því að frysta laun á árinu 2012 eða lækka laun á árinu og segja að allt tal um að hækka laun sé óraunhæft. Það eru lítil tengsl á milli þess veruleika, sem þannig blasir við írskum launþegum og boðskap sendimanna, sem ESB sendir hingað til lands til þess að uppfræða okkur Íslendinga um velgengni Íra í baráttu þeirra við afleiðingar fjármálakreppunnar á Írlandi.

Er ekki kominn tími til að Alþýðusamband Íslands fái hingað ræðumenn frá heildarsamtökum verkalýðsins á Grikklandi, Spáni og Írlandi til að segja okkur Íslendingum frá hlutskipti launþega í þessum ríkjum? Það væri áreiðanlega mjög gagnlegt innlegg í umræður Alþýðusambandsins um íslenzku krónuna og valkosti okkar Íslendinga í gjaldmiðilsmálum.