Trójuhestar ESB

Það er ótrúlega margt líkt með þeirri stöðu, sem við erum nú í gagnvart Evrópusambandinu og þeirri stöðu, sem við vorum í gagnvart Bretlandi í þorskastríðunum. Í raun er eini munurinn sá, að Evrópusambandið hefur enn ekki hótað að senda herskip á vettvang til þess að koma í veg fyrir makrílveiðar okkar.

Bretar settu á okkur löndunarbann fyrir meira en hálfri öld, fáum árum eftir að íslenzkir sjómenn hættu lífi sínu til þess að færa þeim fisk á styrjaldarárunum. Bretum var í mun að draga okkur fyrir dómstól og vísuðu 50 mílna deilunni til Alþjóðadómstólsins í Haag, sem að vísu var í samræmi við landhelgissamningana, sem gerðir voru um 12 mílurnar.

Löngu áður en dómur var kveðinn upp í Haag var ljóst að við mundum hafa hann að engu enda málið allt úrelt eftir útfærslu í 50 mílur og niðurstaðan var sú, að dómurinn skipti engu máli.

Nú er bæði haft við orð að setja á okkur löndunarbann og við erum dregnir fyrir dómstól. Að vísu virðast ESB-sinnar á Íslandi þeirrar skoðunar, að ísenzka þjóðin hafi ákveðið að „fara dómstólaleiðina“ með því að vísa Icesave-samningunum út í hafsauga. Það er einhver misskilningur hjá þeim. Þjóðin ákvað ekki að „fara dómstólaleiðina“. Það voru menn út í löndum, sem tóku þá ákvörðun.

Í raun og veru er eini munurinn nú og þá sá, að kjörnir forystumenn íslenzku þjóðarinnar virðast nú koma fram eins og málsvarar þeirra, sem hafa í hótunum við okkur og fara til dómstóla. Þeir reyna að gera eins lítið úr þessum hótunum eins og þeir geta. Passa að nota orðið „löndunarbann“ ekki, eins og m.a. mátti sjá á Össuri Skarphéðinssyni í sjónvarpsfréttum í gærkvöldi og leggja sig fram um að gera eins lítið úr hótunum Evrópusambandsins eins og mögulegt er.

Þetta er önnur staða en var í þorskastríðunum. Þá höfðu andstæðingar okkar ekki málaliða í vinnu fyrir sig hér heima fyrir.

Eitt andartak mátti ætla í gærkvöldi að stjórnarflokkarnir ætluðu a taka eitthvert frumkvæði í samskiptum við Evrópusambandið, þegar upplýst var í sjónvarpsfréttum að Árni Þór Sigurðsson, formaður utanríksmálanefndar Alþingis mundi eiga fund með Barroso, forseta framkvæmdastjórnar ESB í Kaupmannahöfn í dag. Svo kom í ljós að þetta var villandi fréttaflutningur. Árni Þór verður á fundi í Kaupmannahöfn í dag, sem Barroso mætir á og hefur þar tækifæri til að spyrja hann spurninga ásamt öðrum. Sjálfsagt var það ónákvæmni hjá RÚV hvernig fréttin var sett fram en ekki ásetningur um að gefa annað til kynna.

Það hefur aldrei verið auðvelt að vinna stríð með Trójuhesta innan borðs.