Stjórnendur á móti ESB-aðild - fýkur í öll skjól aðildarsinna

Niðurstöður könnunarinnar eru þær að 63,9% stjórnenda í atvinnulífinu eru mótfallnir aðild að ESB en 36,1% hlynntir af þeim sem tóku afstöðu til málsins. Stjórnendur fyrirtækja á landsbyggðinni eru líklegri til að vera mótfallnir aðild að ESB en þeir á höfuðborgarsvæðinu. Þá eru 65,1% karla andvígir aðildinni en 57,4% kvenna. Fram kemur í könnuninni að tæp 80% stjórnenda útgerðarfyrirtækja eru andsnúnir aðild að ESB og er andstaðan þar mest.

Þessar tölur tala sínu máli og staðfesta enn hve erfitt er að finna nokkurn hóp innan samfélagsins þar sem meirihluti manna er hlynntur aðild að Evrópusambandinu. Raunar má segja að slíkan hóp sé nú aðeins að finna innan Samfylkingarinnar eða meðal þeirra sem sameinast undir merkjum regnhlífarsamtakanna Já, Ísland.

Sé málum enn þannig háttað innan Samfylkingarinnar að meirihluti manna þar berjist enn fyrir aðild að Evrópusambandinu ber að líta til þess hvernig fylgi flokksins hefur þróast á þessu kjörtímabili eftir að honum tókst að knýja fram samþykkt á ESB-aðildarumsókn sumarið 2009. Samfylkingin fékk 29,8% atkvæða í kosningunum 25. apríl 200. Í lok apríl 2012 mældist fylgi flokksins 18,7% hjá Capacent Gallup. Fylgið hefur því minnkað um tæp 11 prósentustig frá því að flokkurinn dró gunnfána ESB að húni.

Sé litið á opinbera kynningu á viðræðum fulltrúa Íslands og ESB undanfarin misseri hefur hún öll verið á jákvæðum nótum. Þeir sem spáðu því að Íslendingar mundu greiða þjóðaratkvæði um ESB-aðildarsamning sumarið 2010 eða í síðasta lagi vorið 2011 láta meira að segja eins og engar snurður hafði hlaupið á þráðinn. Stækkunardeild Evrópusambandsins heldur úti sérstakri kynningarskrifstofu í landinu og sendiherra ESB á Íslandi þeytist um landið þvert og endilangt til að flytja fagnaðarboðskapinn um ESB.

Vakni spurningar um afstöðu ESB í garð Íslands vegna málaferla út af Icesave eða vegna refsiaðgerða til að stöðva íslenskar makrílveiðar keppast ráðamenn í Reykjavík og Brussel við að halda því fram að þessi mál snerti ekkert aðildarviðræðurnar. Utanríkisráðherra Íslands telur að öll vandræði vegna skuldakreppinnar á evru-svæðinu séu jákvæð fyrir Íslendinga, evran verði bara orðinn að sterkari gjaldmiðli þegar Íslendingum standi hún til boða eftir aðild að ESB.

Bilið á milli fagurgala ESB-aðildarsinna og skoðana Íslendinga breikkar stöðugt. ESB-aðildarmálið verður til sífellt meiri vandræða í Reykjavík og Brussel. Samskipti Íslands og ESB hafa verið farsæl í 20 ár undir merkjum evrópska efnahagssvæðisins. Það á að leyfa því samstarfi að þróast og þroskast áfram í stað þess að hleypa öllu í bál og brand með aðildarumsókn sem nýtur síminnkandi stuðnings - og það áður en tekið er til við að ræða hin raunverulegu ágreiningsefni, málin sem ekki eru leyst innan ramma EES-samningsins.