Nú á að taka Ögmund á orðinu - og það strax

Ögmundur Jónasson, innanríkisráðherra, gaf athyglisverða yfirlýsingu í eldhúsdagsumræðunum í gærkvöldi. Hann sagði að verkefnið væri nú að ná samkomulagi um dagsetningu þjóðaratkvæðagreiðslu, þar sem spurningin yrði:

„Vilt þú að Ísland gangi í Evrópusambandið?“

Ögmundur viðurkenndi að hann og skoðanabræður hans hefðu ekki séð fyrir þá vegferð, sem þjóðin hefði lagt í með aðildarumsókninni að ESB og heldur ekki þá sundrungu, sem sú umsókn hefði skapað í samfélaginu.

En svo bætti ráðherrann við að hann vildi ekki hlaupa frá þessu verkefni, þ.e aðildarumsókninni. Hvað á hann við? Ef þjóðin hafnar aðild að ESB í þjóðaratkvæðagreiðslu liggur þá ekki í augum uppi að verkefninu yrði þar með snarlega lokið? Því verður ekki trúað að Ögmundur telji að slík þjóðaratkvæðagreiðsla eigi að vera „ráðgefandi“.

Þetta er að vísu ekki í fyrsta sinn, sem erfitt er að festa hendur á yfirlýsingum Ögmundar Jónassonar um aðildarumsóknina að ESB en að þessu sinni er ástæða til að taka ráðherrann á orðinu.

Nú eiga forystumenn Sjálfstæðisflokks, Framsóknarflokks og aðrir þingmenn, sem andvígir eru aðild Íslands að ESB að horfa fram hjá síðustu setningunni eins og hún hafi aldrei verið sögð og óska eftir viðræðum við Ögmund Jónasson um dagsetningu þeirrar þjóðaratkvæðagreiðslu, sem hann leggur til að fari fram.

Slík ósk á að koma fram strax í dag.

Í ljósi atkvæðagreiðslunnar, sem fram fór á dögunum um tillögu Vigdísar Hauksdóttur og yfirlýsinga þingmanna Hreyfingarinnar í því sambandi er ljóst að náist samkomulag við Ögmund er kominn meirihluti á Alþingi fyrir þjóðaratkvæðagreiðslu um ESB fyrir næstu kosningar.

Þessu tækifæri má ekki glutra niður.