Náði brezka bankasvindlið til Íslands?

Bankahneykslið í Bretlandi er meiriháttar hneyksli og líklegt til að vinda upp á sig og verða að alþjóðlegu hneyksli. Í grunninn snýst það um, að nokkrir bankar hafa fiktað við Libor-vextina, markaðurinn hafi ekki ráðið, heldur þröngir hagsmunir þeirra sjálfra. Í þessu felst stórfelld misnotkun aðstöðu. Og minnir á meinta markaðsmisnotkun banka hér.

Í Bretlandi er nú spurt hvaða áhrif þetta athæfi hafi haft á almenna borgara og fyrirtæki þar í landi. Hvort vaxtasvindlið hafi leitt til þess að allt samfélagið hafi borgað meira en ella, hvort bankamennirnir hafi í raun farið ofan í vasa almennings í landinu og sópað til sín fé.

Stjórnmálamönnum í Bretlandi varð strax ljóst í gær, þega upplýst var um sektargreiðslur Barclays-banka vegna þessa svindls um hvers konar stærðargráðu er að ræða. Osborne, fjármálaráðherra tilkynnti þegar í stað, að hann mundi skoða möguleika á stofnun sérstakrar rannsóknarnefndar fyrir opnum tjöldum á borð við Levenson-yfirheyrslurnar yfir fjölmiðlamönnum og stjórnmálamönnum þar í landi. Leiðtogi Verkamannaflokksins krefst glæparannsóknar á starfsháttum Barclays-banka.

Hér á Íslandi hljótum við að spyrja í ljósi náinna tengsla íslenzkra banka við brezka bankaheiminn, hvers konar áhrif þessi svindlstarfsemni hafi haft hér. Var kannski líka farið ofan í vasa íslenzkra borgara.

Það er óhjákvæmilegt að skoða áhrif þessa máls hér.