Evruríkin aftur á byrjunarreit-lántökukostnaður Spánar æðir upp

Þótt ótrúlegt kunni að virðast er ljóst að evruríkin eru komin í sömu stöðu og þau voru fyrir rúmum 10 dögum, þegar leiðtogafundur ESB var haldinn, sem átti að leysa aðkallandi vandamál ríkjanna í Suður-Evrópu. Nú er lántökukostnaður Spánar aftur kominn yfir 7% og lántökukostnaður Ítala er á uppleið. Peningarnir streyma frá Spáni segir í fréttum í morgun, mánudagsmorgni og að þessu sinni til Frakklands.

Það sem kannski er enn alvarlegra er að fjölmiðlar í Evrópu eru í dag mjög með hugann við að djúp gjá sé að myndast á milli hinna betur stæðu þjóða í Norður-Evrópu og hinna ver settu og skuldsettu þjóða í Suður-Evrópu. Bæði BBC og Reuters gera þessa gjá að umtalsefni í dag og Reuters lýsir henni á þann veg, að ósýnilegt tjald sé að rísa í Evrópu, eins konar járntjald á milli lánardrottna og hinna skuldsettu, á milli þeirra, sem búa við lága vexti og hinna, sem búa við háa vexti.

Á sama tíma setur virtur fræðimaður fram þá skoðun, að Finnar kunni að verða fyrstir þjóða til að yfirgefa evrusvæðið. Eftir leiðtogafundinn var því haldið fram að Angela Merkel hefði beðið mikinn ósigur. Hafi hún gert það vann hún um leið mikinn sigur á heimavígstöðvum, því að traust til hennar hefur aldrei verið meira.

Það fer ekkert á milli mála, að Evrópusambandið og forysta þess á fullt í fangi með að halda samstarfi aðildarríkjanna saman og alveg eins líklegt að það bresti með einhverjum hætti á næstu misserum.

Og samt er enn til stjórnmálaflokkur á Íslandi, sem telur að það henti hagsmunum íslenzku þjóðarinnar bezt að ganga inn í þennan sundraða hóp!