ESB ásælist Grænland og Ísland-Hverjir eru Trójuhestarnir?

Fyrr á öldum og fram á þá tuttugustu þurftu vestrænar þjóðir ekki að hugsa mikið um almenningsálit, þegar þær ásældust auðlindir annarra þjóða. Þær sendu einfaldlega heri sína á vettvangi og lögðu þau ríki undir sig, sem voru eftirsóknarverð. Þegar heimsveldi Breta stóð sem hæst réðu þeir yfir um 20% af íbúum jarðar. Íbúafjöldi Brezka heimsveldisins þá var áþekkur og íbúafjöldi aðildarríkja Evrópusambandsins nú. Það segir sína sögu um þann ótrúlega árangur, sem þessi tiltölulega fámenna eyþjóð náði við að leggja önnur ríki undir sig. Þeirri sögu lauk hins vegar ekki endanlega fyrr en sumarið 1956, þegar Nasser þjóðnýtti Súezskurðinn.

Bretar voru ekki einir á ferð að koma sér upp nýlendum. Það gerðu fleiri Evrópuþjóðir. En nú geta þær ekki lengur sent heri sína á vettvangi ef þær ásælast auðlindir annarra þjóð. Nú fara þessar sömu þjóðir svonefndar „diplómatískar“ leiðir að því að ná markmiðum sínum.

Þetta kemur glöggt fram í frétt hér á Evrópuvaktinni í dag um áform Evrópusambandsins að því er varðar Grænland. Augu umheimsins eru að opnast fyrir þeim gífurlegu auðlindum, sem er að finna á Grænlandi. Þær auðlindir þýða, að þegar líður fram á þessa öld verða Grænlendingar ein ríkasta þjóð heims.

Það byggist þó á því að þeir láti ekki fagurgala Evrópusambandsins freista sín. Einn af forráðamönnum Evrópusambandsins upplýsir í samtali við brezka blaðið Guardian að forráðamenn þess leggi nú hart að sér að vinna með forsætisráðherra Grænlands. Af hverju ætli fulltrúar 500 milljóna manna leggi svo hart að sér að vingast við fulltrúa um 56 þúsund manna á hjara veraldar? Það er ósköp einföld skýring á því. Fulltrúar þessara 500 milljóna ágirnast auævi þessara 56 þúsund manna.

Við Íslendingar og Grænlendingar erum í sömu stöðu. Eini munurinn er sá, að þeir eru miklu ríkari en við. Hins vegar þurfum við ekki að kvarta. Slíkar eru auðlindir Íslands.

En Evrópusambandið ásælist hvoru tveggja, auðlindir Grænlands og auðlindir Íslands. Hins vegar er Evrópusambandið ekki eitt um það. Kínverjar hafa áhuga á því sama. Þeir eru að koma sér fyrir í námuvinnslu í Grænlandi. Þar er á ferð brezkt fyrirtæki, sem heitir London Mining. Hverjir skyldu standa á bak við það fyrirtæki? Guardian segir að því sé bæði stjórnað og fjármagnað frá Kína.

Það er tímabært að auðlindaríkar eyþjóðir í Norður-Atlantshafi stilli saman strengi sína til að verjast ásælni hinna gömlu nýlenduvelda í Evrópu, sem birtast okkur nú eins og siðfágaðir diplómatar, sem vilja „vinna með“ okkur.

Þetta eru úlfar í sauðagæru.

Og Trójuhestarnir eru gamlir, afdankaðir sósíalistar, kommúnistar, maóistar og Trotskyistar, sem hafa gerzt handbendi „auðvaldsaflanna“ í Evrópu!