Einstakt tækifæri fyrir Sjálfstæðis­flokkinn

Tilraun Vinstri grænna til að láta eitthvað að sér kveða í baráttunni gegn aðild Íslands að Evrópusambandinu er runnin út í sandinn. Þeir tóku ekki af skarið á flokksráðsfundi sínu, eins og margir gerðu sér vonir um bæði innan flokksins og utan að þeir mundu gera. Að vísu má gera ráð fyrir að þeir setji á svið einhvers konar samtöl við Samfylkingu um málið en það er alveg ljóst að Steingrímur J. Sigfússon er ekki tilbúinn til að láta skerast í odda. Jafnframt fer ekki á milli mála, að markmið núverandi stjórnarflokka er að halda áfram eftir kosningar með þriðja hjól undir vagni. Að fenginni reynslu eru meiri líkur en minni á því að ef það gerist haldi aðlögunarferlið að Evrópusambandinu áfram.

Þessi staða veitir Sjálfstæðisflokknum einstakt tækifæri til þess að verða hin raunverulega brjóstvörn þeirra, sem eru andvígir aðild. Sjáfstæðisflokkurinn hefur möguleika á því að fá stuðning kjósenda, sem hingað til hefðu aldrei getað hugsað sér að kjósa þann flokk en geta hugsað sér það nú vegna ESB-málsins.

Til þess að svo megi verða þarf Sjálfstæðisflokkurinn hins vegar að setja ESB á oddinn í öllum málflutningi sínu fram að kosningum og sýna með ótvíræðum hætti að einlæg sannfæring sé að baki. Það á ekki að vera erfitt vegna þess að sannfæring grasrótarinnar í Sjálfstæðisflokknum fer ekki á milli mála, þegar kemur að spuringunni um aðild.

Það sem hins vegar getur þvælzt fyrir Sjálfstæðisflokknum í þessum málum eru sérhagsmunir einstakra hópa sem hafa áhrif innan flokksins.

Það eru þjóðarhagsmunir að Ísland standi utan ESB. Þegar kemur að þjóðarhagsmunum hljóta sérhagsmunamál einstakra þjóðfélagshópa að víkja.