Evrukreppan ógnar fjárhagslegum stöðugleika á heimsvísu

Það er óneitanlega athyglisvert að á sama tíma og talsmenn aðildar að Evrópusambandinu hér á Íslandi og um leið talsmenn upptöku evru í stað íslenzku krónunnar halda því fram, að með hvoru tveggju mundu Íslendingar nái meiri stöðugleika í efnahagslíf þjóðarinnar kemur Alþjóða gjaldeyrissjóðurinn fram á sjónarsviðið og segir að fjárhagslegum stöðugleika í heiminum stafi ekki eins mikil hætta af nokkru eins og evrusvæðinu og kreppunni þar.

Hvernig má það vera að aðild að ESB og upptaka evru mundi tryggja fjárhagslegan stöðugleika hér, þegar hið sama er að mati AGS mesta hættan, sem steðjar að stöðugleika á heimsvísu?!

Annars er ekki ástæða til að gera að gamni sínu, þegar svo grafalvarleg mál eru á ferðinni. Veruleikinn er sá, að efnahagshorfur á heimsvísu fara ekki batnandi heldur versnandi og kreppan á evrusvæðinu er ein helzta ástæða þess. Nú standa Norðurlandaþjóðirnar frammi fyrir því, að evrukreppan er að byrja að hafa áhrif á efnahag þeirra. Og það er ósköp skiljanlegt. Um þriðjungur af útflutningi Svía fer til evrusvæðisins og augljóst að þegar hvorki fólk né fyrirtæki þar hafa efni á að kaupa dregst sá útflutningur saman.

Yfirleitt hafa Írar verið taldir standa bezt þeirra evruþjóða, sem leitað hafa eftir neyðaraðstoð. Við nánari skoðun kemur í ljós, að atvinnuleysi á Írlandi er um 15% og er að aukast en ekki minnka. Nýjustu tölur sýna, að atvinnuleysi á meðal ungs fólks á Grikklandi er komið í 53%.

Samt vill Alþýðusamband Íslands feta í fótspor Íra og Grikkja og taka upp evru til að tryggja fjárhagslegan stöðugleika á Íslandi.

Það er a.m.k. ljóst að evran mundi ekki tryggja fjárhagslegan stöðugleika heimilanna á Íslandi.