Fór Evrópskur dagur aðgerða og einingar fram hjá ASÍ?

Í dag er Evrópskur dagur aðgerða og einingar í Evrópu, sérstaklega í Suður-Evrópu. Talið er að 40 verkalýðssamtök í 23 ríkjum taki þátt í aðgerðum í dag. Meginþungi þeirra er á Spáni og í Portúgal. Í þeim löndum tveimur er skollið á allsherjarverkfall. Mótmælaaðgerðir eru í 40 borgum og bæjum í Portúgal. Samgöngur á Spáni hafa stöðvast. Í morgun höfðu 600 flugferðir verið felldar niður. Á Ítalíu stöðvast öll vinna í fjóra klukkutíma í dag. Í Frakklandi eru 130 mótmælagöngur og fundir. Í Belgíu standa yfir aðgerðir. Mótmælaaðgerðir hefjast í Aþenu um hádegisbil og enda á aðaltorgi borgarinnar.

Hverju er verið að mótmæla? Niðurskurði og skattahækkunum, sem koma þyngst niður á jaðarríkjum evrusvæðisins og ekki sér fyrir endann á. Verkalýðssamtökin í þessum löndum telja að þessi stefna sé að leiða til fátæktar og dýpri efnahagskreppu en ella.

Ástæður fyrir þessu ástandi eru margar en ljóst að evran hefur sett aðildarríkin í spennitreyju, sem þau komast ekki úr.

Ekki fer á milli mála, að þessar aðgerðir eru mjög víðtækar. Reuters-fréttastofan telur, að milljónir manna muni taka þátt í þeim í dag.

Hins vegar hefur lítið heyrzt af því að verkalýðssamtökin á Íslandi hafi lýst samstöðu með bræðrum sínum í Evrópu. Hvað ætli valdi því að „Evrópskur dagur aðgerða og einingar“ hefur farið fram hjá Alþýðusambandi Íslands? Er ASÍ ekki aðili að margvíslegu evrópsku samstarfi verkalýðsfélaga? Hefði ekki verið við hæfi að ASÍ efndi til svo sem eins og eins fundar til þess að lýsa samstöðu með bræðrum sínum og systrum í Evrópu?

Kannski er slík samstaða ekki lengur á dagskrá Alþýðusambands Íslands. Það telur sig hafa öðrum hnöppum að hneppa í Evrópumálum.

En verkfalls- og mótmælaaðgerðir milljóna í Evrópu í dag segja sína sögu um það sem er að gerast á meginlandi Evrópu.