Þetta er hættulegt

Silvio Berlusconi notar Þjóðverja til að berja á Mario Monti, eftirmanni sínum á forsætisráðherrastóli á Ítalíu vegna þess að kannanir sýna, að jarðvegur er fyrir slíkum árásum á Ítalíu. Ný skoðanakönnun sýnir að afstaða Ítala til Þjóðverja er að harðna og að um 83% þeirra telja að áhrif Þýzkalands innan ESB séu of mikil. Sama tala var 53% í október 2011. Að auki sýna þessar kannanir að 74% Ítala telja, að Þýzkaland geri ekki nóg til að sýna samstöðu með öðrum evruríkjum.

Þær tilfinningar ESB-þjóða í garð hverrar annarrar, sem birtast annað hvort í skoðanakönnunum eða með þeim hætti að einstakir stjórnmálamenn nota svona neikvæðar tilfinningar í garð nágrannaríkja í þágu eigin pólitískra hagsmuna heima fyrir eru í raun og veru hættulegri fyrir þessi ríki en efnahagsvandi. Ef einhverjum tekst að kveikja í þessari púður tunnu er fjandinn laus. Þetta veit Berlusconi, sem hefur engu að tapa en allt að vinna. Þess vegna hagar hann sér á þann veg, sem hann gerir.

Sams konar jarðvegur er til staðar á Grikklandi en það á eftir að koma í ljós hvort einhver reynir að notfæra sér hann með jafn purkunarlausum hætti og Berlusconi ætlar greinilega að gera. Sá jarðvegur er líka til staðar á Spáni og það sama getur gerzt þar.

Evrukreppan er í fyrsta sinn frá lokum heimsstyrjaldarinnar síðar að kalla fram víðtæka andbúð á Þjóðverjum og öllu því, sem þýzkt er í Evrópu. Þetta er hættulegt.

Og þótt Evrópusambandið hafi að verðleikum fengið friðarverðlaun Nóbels er ekki hægt að útiloka að það merka starf, sem unnið er á þess vegum eigi eftir að leiða til nýs ófriðar á meginlandi Evrópu.