ESB kann þá list að bíða

Könnun sem Félagsvísindastofnun Háskóla Íslands gerði um mikilvægustu mál næstu fjögurra ára í augum kjósenda hefur orðið tilefni nokkurra frétta í RÚV eins og eðlilegt er en þó eru niðurstöður þessarar könnunar eins og við mátti búast. Auðvitað er það skuldavandi heimilanna, heilbrigðismál og atvinnumál, sem brenna mest á fólki.

Og engum þarf að koma á óvart að einungis 19,5% telja að Evrópumálin séu meðal mikilvægustu mála næstu fjögurra ára. Yfirgnæfandi meirihluti þjóðarinnar er andvígur aðild að Evrópusambandinu. Það er lítill minnihluti, sem er fylgjandi aðild. Og af þessum ástæðum svo og þeim, að þeir tveir flokkar, sem eru andvígir aðild, þ.e. Sjálfstæðisflokkur og Framsóknarflokkur, verða skv. könnunum með yfirgnæfandi meirihluta á Alþingi að kosningum loknum lítur fólk svo á að málið sé afgreitt.

Af þessum ástæðum eru yfirgnæfandi líkur á, að það verði eitt fyrsta verkefni nýrrar ríkisstjórnar að stöðva viðræður við Evrópusambandið. En þó er það svo að málið er ekki afgreitt fyrr en það hefur verið gert. Þess vegna verða andstæðingar aðildar í öllum flokkum að halda vöku sinni og bregðast hart við ef nokkrar vísbendingar koma fram um að það verði ekki gert.

Við megum ekki gleyma því, að Evrópusambandið lítur á það sem sína hagsmuni að Ísland gangi inn. Gleymum því ekki heldur að Evrópusambandið hefur yfir miklum fjármunum að ráða til þess að tryggja að svo verði. Og svo má heldur ekki gleyma því að ríkjabandalög af þessu tagi kunna þá list að bíða.

Af þessum ástæðum mega andstæðinga aðildar ekki sofna á verðinum fram að kosningum og verða að veita nýrri ríkisstjórn nauðsynlegt aðhald, þar til þessum málum hefur verið lokið.