Stórveldin innan ESB fórna smáríkjum eins og Grikklandi í þágu sérhagsmuna sinna

Nú liggur fyrir skýrt dæmi um hvernig Evrópusambandið og evruríkin sérstaklega fara með litla þjóð, sem má sín ekki mikils í samskiptum við hin evrópsku stórveldi. Ný skýrsla Alþjóða gjaldeyrissjóðsins sjálfs um framkvæmd björgunaraðgerða vð Grikkland dregur fram í dagsljósið alvarleg mistök þríeykisins svonefnda, sem eru sjóðurinn sjálfur, Evrópusambandið og Seðlabanki Evrópu. Skýrslan hefur valdið uppnámi í Brussel. Framkvæmdastjórn Evrópusambandsins mótmælir hástöfum. Seðlabanki Evrópu þegir.

Í skýrslunni kemur fram að AGS hafi slakað á reglubundnum vinnubrögðum og ofmetið hvað Grikkland gæti staðið undir miklum skuldum og að sjóðurinn hefði átt að ganga harðar fram í því og fyrr, að lánveitendur Grikklands í einkageiranum, sem þýðir bankar á Vesturlöndum, tækju á sig afskriftir.

Þessi mistök túlkar Ambrose Evans-Pritchard, alþjóðlegur viðskiptaritstjóri Daily Telegraph í London á þann veg, að Grikklandi hafi verið fórnað fyrir evruna til þess að hlífa bönkum, sennilega í Frakklandi og Þýzkalandi, við miklu tapi strax á árinu 2010. Þegar dæmið hafi ekki gengið upp hafi ráðamenn í evrulöndum undir forystu Wolfgang Schauble, fjármálaráðherra Þýzkalands gengið fram fyrir skjöldu og sagt að ástæðan væri sú, að Grikkir stæðu ekki við skuldbindingar um aðgerðir á heimavígstöðvum.

Ritstjórinn kallar þetta athæfi glæp og hvetur til þess að Olli Rehn, fulltrúi í framkvæmdastjórn ESB, sem hefur með þessi mál að gera segi af sér og taki ábyrgð á þessum alvarlegu mistökum. Hann bendir á að í hvaða lýðræðisríki sem væri mundi fjármálaráðherra, sem bæri ábyrgð á slíku athæfi verða að segja af sér.

Hér á Íslandi hafa aðildarsinnar talað á þann veg að aðild að ESB og upptaka evru væri eins og aðgangur að einhvers konar himnaríki fyrir Íslendinga. Í þeim félagsskap væru allir góðir vinir, hjálpuðu hver öðrum, smáþjóðir hefðu rödd, sem heyrðist við borðið o.sv. frv.

Nú liggur fyrir í skýrslu eins aðilans að björgunaraðgerðunum við Grikkland, Alþjóðagjaldeyrissjóðsins sjálfs að þetta er allt uppspuni, eins og reyndar margsinnis hefur verið haldið fram hér á þessum vettvangi. Stóru ríkin innan ESB svífast einskis í samskiptum við smáríkin og fórna þeim samvizkulaust í þágu eigin sérhagsmuna ef svo ber við.

Þetta liggur nú fyrir skjalfest og sannað í sambandi við Grikkland.