Kona sem talar hreint út

Viviane Reding, varaforseti framkvæmdastjórnar Evrópusambandsins er athyglisverð kona, sem talar stundum hreint út, sem ekki er algengur eiginleiki í fari þeirra, sem þar starfa. Nú hefur hún í samtali við gríska dagblaðið Kathimerini sagt tvennt, sem máli skiptir.

Í fyrsta lagi gagnrýnir hún þau viinnubrögð þríeykisins svonefnda, þ.e. Evrópusambandsins, Alþjóða gjaldeyrissjóðsins og Seðlabanka Evrópu að knýja fram niðurstöður á borð við uppsagnir tugþúsunda opinberra starfsmanna í Grikklandi á bak við lokaðar dyr. Hún segir að slíkar ákvarðanir eiga að ræða fyrir opnum tjöldum.

Þetta er rétt hjá Viviane Reding.

Í öðru lagi segir hún að tími þríeykisins sé liðinn og spyr hvort fólk viti hvaðan peningar Alþjóða gjaldeyrissjóðsins, sem hafa m.a. verið notaðir til að bjarga þremur evruríkjum, þe. Grikklandi, Portúgal og Írlandi, komi. Hún segir þá m.a. koma frá löndum eins og Brasilíu og Indlandi en í þeim löndum sé miklu fátækara fólk heldur en í evruríkjunum. Evrópuríkin eigi að geta séð um sig og geti það.

Þessi orð Viviane Reding eru mikið umhugsunarefni fyrir evruríkin og reyndar aðra líka, sem notið hafa aðstoðar AGS eins og Ísland.

Varaforseti Evrópusambandsins (sem kemur frá Lúxemborg) segir að fólkið í Evrópu treysti þríekinu ekki. Það er mikið sagt miðað við þá stöðu sem Reding gegnir.

Það er traustvekjandi, þegar forystumenn innan Evrópusambandsins tala á þennan veg. Það er gott til þess að vita að þar er að finna innan dyra fólk, sem sér þessi mál öll í svo skýru ljósi.