Það skiptir máli að standa við sannfæringu sína

-en hlaupast ekki undan af ótta við einstaka hópa kjósenda

Þeir stjórnmálamenn eru færri sem standa við sannfæringu sína. Fleiri hneigjast til tækifærismennsku og að fljóta með straumnum. Þeir síðarnefndu komast stundum betur af í núinu ef svo má að orði komast og njóta dægurvinsælda en þegar upp er staðið verður dómur sögunnar sá, að þeir skipta engu máli.

Hinir, sem standa við málefnalega sannfæringu sína og fylgja henni eftir lenda oft í mótvindi og stundum mjög erfiðum. En þeir rísa upp, þegar dómur sögunnar fellur.

Þetta er sagt vegna þess vandræðagangs, sem af óskiljanlegum ástæðum hefur einkennt meðferð ESB-málsins í tíð núverandi ríkisstjórnar.

Að vísu skiptir öllu máli, að utanríkisráðherra fór snemma á ráðherraferli sínum til Brussel og tók af skarið.

En þar fyrir utan hefur vandræðagangurinn birzt með ýmsum hætti. IPA-styrkirnir, sem til umræðu eru þessa dagana eru skýrt dæmi um þetta. Ríkisstjórnin hefur greinilega verið hrædd við viðbrögð þeirra, sem áttu von á peningum en fá ekki. Þess vegna hefur henni þótt betra að ESB tæki sjálft þá augljósu ákvörðun að hætta þessum styrkveitingum en að hún sjálf tæki af skarið. Niðurstaðan er hins vegar sú, að það er erfitt að komast hjá því að líta svo á að ríkisstjórnin hafi sýnt aumingjaskap í málinu og ekki þorað að standa við sannfæringu sína.

Fyrir nokkrum vikum lýsti forsætisráðherra því yfir opinberlega að vinna við mat á stöðu viðræðna og þróun Evrópusambandsins væri hafin en fyrir skömmu upplýsti utanríkisráðherra að hún mundi hefjast um eða upp úr miðjum ágúst.

Hvað er svona flókið?

Einæg sannfæring Gunnars Braga Sveinssonar, utanríkisráðherra í ESB-málum verður ekki dregin í efa. Líklegra er að skýringin á vandræðagangi ríkisstjórnarinnar sé sú, að stjórnarflokkarnir hafi ekki sameiginlega mótað sér skýrar hugmyndir um framhaldið.

Það gengur ekki.

Ráðherrarnir eru önnum kafnir við erfið innanlandsmál. En þeir komast ekki hjá því að sinna stórum málum á borð við ESB og Ísland og deilur Færeyinga við ESB.