Obama velur leið lýðræðisins vegna Sýrlands

Það er afar athyglisvert að fylgjast með framvindu mála í Bandaríkjunum og Bretlandi vegna áforma um árás á Sýrland vegna notkunar efnavopna þar. Svo virðist sem Barac Obama, forseti Bandaríkjanna hafi ákveðið að fara leið lýðræðisins í stað þess að notfæra sér möguleika, sem hann hefur skv. bandarískum lögum til þess að taka þessar ákvarðanir einn.

Atkvæðagreiðslan í brezka þinginu markaði að sjálfsögðu þáttaskil. Þingið tók fram fyrir hendur forsætisráðherrans í máli, sem varðar hernaðarleg afskipti Breta af málefnum annarra þjóða. Hvort sem menn eru með eða móti árás á Sýrlandi er ljóst að lýðræðisleg vinnubrögð voru höfð í heiðri.

Í kjölfar þess tók Obama ákvörðun um að leggja málið fyrir bandaríska þingið, þótt það hafi vafalaust verið af pólitískum ástæðum innanlands. En sú ákvörðun þýðir hins vegar að málið er rætt meðal fólks um landið allt og lýðræðislegar umræður fara fram ekki bara á Bandaríkjaþingi heldur út um allt samfélagið, á heimilum, vinnustöðum, kaffihúsum o.sv. frv.

Þetta er til fyrirmyndar frá sjónarhóli lýðræðislegra vinnubragða.

Eins og við mátti búast er Obama sakaður um að vera hikandi og geta ekki gert upp hug sinn. Slíkar ákvarðanir koma alltaf fram á hendur kjörnum fulltrúum sem kjósa að fara leið lýðræðisins í stað þess að stjórna af geðþótta.

Þetta er umhugsunarefni fyrir fleiri en Breta og Bandaríkjamenn.