Hvítbók um ESB-viðræður

Misvísandi yfirlýsingar um samskipti okkar við Evrópusambandið síðustu ár kalla á að gefin verði út Hvítbók um þau samskipti. Það er ekki hægt að láta málið hanga í lausu lofti og að engin svör fáist við þeim spurningum, sem hafa vaknað eftir yfirlýsingu Stefáns Fule, stækkunarstjóra um að tilboð um aðildarsamning hafi verið í burðarliðnum án þess að nokkrar formlegar viðræður hefðu farið fram um sjávarútvegsmál.

Þessar spurningar eru m.a.:

Hvers vegna sagði Össur Skarphéðinsson í marz 2012 að engin tengsl væru á milli makríldeilunnar og aðildarviðræðna en sagði svo fyrir nokkrum dögum að í dag viti allir að svo hafi verið?

Hafa farið fram einhverjar óformlegar viðræður á milli íslenzkra ráðamanna á undanförnum árum, sem Stefán Fule grundvallar ummæli sín á?

Hver var sá ráðamaður eða hverjir voru þeir ráðamenn?

Hvað gáfu þeir til kynna við Stefán Fule, að þeir gætu fallizt á í sjávarútvegsmálum?

Í utanríkisráðuneytinu hljóta að vera til upplýsingar um allar þær viðræður, formlegar og óformlegar, sem fram hafi farið á milli ráðamanna ESB og fulltrúa stjórnvalda hér.

Það er eðlileg krafa að sú ríkisstjórn sem nú situr og barðist í aðdraganda þingkosninga fyrir því að stöðva viðræður við Evrópusambandið leggi nú fram í formi Hvítbókar allar þær upplýsingar um þessi mál, sem er að finna í ráðuneytinu.