Veikari staða ríkis­stjórnar áhyggjuefni fyrir andstæðinga aðildar að ESB

Með því að draga fram í miðjan október að taka ákvörðun um hver ætti að vinna að gerð skýrslu um stöðu viðræðna við ESB og þróun Evrópusambandsins, skýrslu, sem ríkisstjórnin lýsti yfir í vor að yrði lögð fyrir þingið í haust, hefur ríkisstjórnin ýtt öllum ákvörðunum varðandi aðildarumsóknina fram á næsta ár. Og þótt gefið hafi verið til kynna að skýrslan muni sjást á Alþingi snemma á næsta ári er allt eins líklegt að það dragist fram eftir vetri.

Hagsmunum hverra þjónar það að draga þetta mál á langinn? Hvers vegna er tiltölulega einföld ákvörðun af þessu tagi dregin mánuðum saman? Það er ekki auðvelt að sjá það eða hver skýringin er. Líklegast er að það sé engin önnur skýring en almennur seinagangur, sem um of einkennir störf þeirra, sem ferðinni ráða hverju sinni.

Hitt er alvarlegt umhugsunarefni fyrir andstæðinga aðildar, að ríkisstjórn, sem fékk umboð þjóðarinnar til að gera hlé á viðræðum gegn loforði stjórnarflokkanna um að frekari skref yrðu ekki ákveðin án samráðs við fólkið í landinu, veikist nú stöðugt ef tekið er mið af skoðanakönnunum. Að vísu er alls ekki óhugsandi að hún nái sér á strik á ný þegar eitthvað fer að sjást til verka hennar. Það hefur fleira dregizt en ákvarðanir um ESB. En auðvitað er það áhyggjuefni fyrir andstæðinga aðildar að ríkisstjórnin veikist og stjórnarflokkarnir þar með ekki í jafn sterkri stöðu og ella til þess að taka af skarið og ákveða með hvaða hætti endir verði bundinn á aðildarumsóknina.

Þessi vinnubrögð eru ekki traustvekjandi og það er ekki hægt að útiloka að þau hafi neikvæðar afleiðingar frá sjónarhóli andstæðinga aðildar.