Þeir vilja ljúka aðlögun Íslands að regluverki ESB-ekki „samningaviðræðum“

Þrennt einkennir umræðurnar á Alþingi um skýrslu Hagfræðistofnunar Háskóla Íslands um stöðu aðildarviðræðna Íslands við ESB og þróun sambandsins. Í fyrsta lagi að þeir tveir flokkar, sem stóðu að því að leggja aðildarumsóknina fram, Samfylking og Vinstri grænir eru í bullandi vörn og hafa ekki undan að verja gerðir sínar frá sumrinu 2009. Í öðru lagi að Samfylkingin er föst í sama fari og hún hefur verið í, hefur ekkert nýtt að segja en endurtekur sífellt að það eigi að ljúka því, sem þingmernn hennar kalla „samningaviðræður“. Og í þriðja lagi að Steingrímur J. Sigfússon snýst í hringi og veit ekki sitt rjúkandi ráð, þegar hann reynir að útskýra svik Vinstri grænna við eigin stefnuyfirlýsingar.

Um málflutning Samfylkingar um að ljúka „viðræðum“ er það að segja, að skýrsla Hagfræðistofnunar staðfestir að ekki er um slíkt að ræða. Það sem Samfylkingin er að hvetja til er að aðlögun Íslands að regluverki Evrópusambandsins verði haldið áfram og lokið. Það er skiljanlegt út frá sjónarmiði þeirra, sem vilja aðild Íslands að Evrópusambandinu en það er fráleitt frá sjónarhorni hinna sem vilja það ekki og þeir eru yfirgnæfandi meirihluti þjóðarinnar eins og nýjar skoðanakannanir sýna.

Hringsnúningur Vinstri grænna er ömurlegt dæmi um það sem kemur fyrir fólk sem stundar þá stjórnmálastarfsemi að segja eitt í dag og annað á morgun. Vinstri grænir eru trausti rúnir og litlar líkur að þeir nái sér á strik. Þeir eiga þó einn kost: Að taka þátt í því að draga umsóknina til baka.

Þeir sem hafa hneigst til þess að vilja ljúka svokölluðum samningaviðræðum til að sjá hvað gæti verið í boði ættu að endurskoða afstöðu sína í ljósi skýrslu Hagfræðistofnunar. Þetta mál snýst ekki um að ljúka „samningaviðræðum“ og skoða þann „samning“. Sú aðferð snýst um að gefa tíma til að ljúka að langmestu leyti aðlögun og innlimun Íslands í regluverk ESB á þann veg að ekki verði aftur snúið.

Og ef Íslendingum dytti í hug þegar þar væri komið sögu að snúa við mundi Evrópusambandið hefja hótanir um refsingar eins og Svisslendingar standa nú frammi fyrir eftir þjóðaratkvæðagreiðslu fyrir skömmu.