Hugmyndir Thorvalds Stoltenberg um norrænan samráðsvettvang um öryggismál eru skynsamlegar

Reglulega berast nýjar fréttir af hernaðarlegum umsvifum Rússa á Norðurslóðum. Nú eru rússneskar sprengjuþotur aftur komnar á kreik við Norður-Noreg og eins og áður fyrr eru bækistöðvar þeirra á Kola-skaga. Gamlar herstöðvar sem búið var að loka þar eru opnaðar á ný. Reyndar er það að gerast á öllu umráðasvæði Rússa í Norðurhöfum. Þeir eru að opna aftur herstöðvar á afskekktum eyjum hér og þar

Til viðbótar er orðið ófriðlegt í Eystrasalti. Ríkin sem land eiga að Eystrasalti, Svíþjóð, Finnland, Danmörk og Eystrasaltsríkin finna öll fyrir því. Þar eru rússneskar herþotur, kafbátar og herskip á ferð í stórauknum mæli.

Í þessu ljósi eru hugmyndir Thorvalds Stoltenberg, fyrrum utanríkisráðherra Noregs, um sameiginlegt öryggis-og varnarmálaráð Norðurlanda meira en athyglisverðar. En frá þeim var sagt fyrir skömmu hér á Evrópuvaktinni.

Þessi auknu hernaðarumsvif Rússa snerta þessar þjóðir allar.

Í ljósi þess að mynztrið í þessum umsvifum Rússa er mjög svipað því sem var á árum kalda stríðsins eru meiri líkur en minni á því að næstu mánuði eða misseri muni þessi sömu umsvif nálgast Ísland. Líklegt er að það sama gerist við Færeyjar.

Enn sem komið er mætti ætla að alþingismenn taki ekki eftir því sem er að gerast hér í okkar heimshluta. Þó hljóta þeir að hafa fengið áhyggjur starfsbræðra sinna á öðrum Norðurlöndum beint í æð á fundi Norðurlandaráðs í Stokkhólmi á dögunum.

Það er fullt tilefni til að hugmyndir Thorvalds Stoltenberg verði ræddar hér. Við eigum ekki minni hagsmuna að gæta en aðrar Norðurlandaþjóðir.

Það getur verið mjög gagnlegt fyrir Norðurlandaþjóðirnar að hafa slíkan formlegan samráðsvettvang, þar sem þær geta borið saman bækur sínar og miðlað upplýsingum sín í milli.

Alþingi á ekki að bíða eftir frumkvæði frá utanríkisráðuneytinu.

Alþingi á sjálft að hafa frumkvæði að því að taka þessi málefni og þar á meðal hugmyndir Stoltenbergs til umræðu.