Fimmtudagurinn 10. júní 2010

ESB ætlar í hart vegna makrílveiða Íslendinga og Færeyinga

Harkalega var ráðist að Íslendingum og Færeyingum á vettvangi ESB-þingsins fyrir skömmu fyrir áform þeirra um makrílveiðar.

Jón Bjarnason rís gegn frumvarpi Jóhönnu

Jón Bjarnason, landbúnaðar- og sjávar­útvegs­ráðherra, lýsir andstöðu sinni við frumvarp forsætis­ráðherra um breytingu á stjórnar­ráðslögunum, sem felur meðal annars í sér, að landbúnaðar- og sjávar­útvegs­ráðuneytið hverfur inn í nýtt atvinnuvega- og nýsköpunar­ráðuneyti. Spurningar hafa vaknað um, hvort Jóhanna Sigurðar­dóttir biðjist lausnar fyrir Jón vegna uppreisnar hans gegn frumvarpi hennar.

Kínverjar styðja evruna

Hluta­bréf í Evrópu lækkuðu í verði gær en hækkuðu í Asíu í nótt samkvæmt fréttum Reuters. Hins vegar styrktist evran og er ástæðan talin yfirlýsing áhrifamikils talsmanns kínversks lífeyris­sjóðs, sem lét jákvæð orð falla um evruna. Nú bíða fjármála­markaðir eftir ákvörðunum Seðlabanka Evrópu og Englandsbanka um vexti en í báðum tilvikum er talið, að stýrivextir verði óbreyttir.

Bandaríkin standa ekki undir áframhaldandi skuldasöfnun

Bernanke, aðalbanka­stjóri bandaríska seðlabankans sagði í vitnisburði fyrir bandarískri þing­nefnd í gær, að fjárlög Bandaríkjanna væru á braut skuldasöfnunar, sem Bandaríkjamenn gætu ekki staðið undir en bætti því við, að aukinn fjárlagahalli síðustu ár hefði verið nauðsynlegur til þess að draga úr efnahagslegum samdrætti.

Leiti Spánverjar aðstoðar verða Bretar að borga

Bretar hafa ekki lagt fram neina fjármuni í björgunar­sjóð ESB og AGS til bjargar Grikklandi. Ástæðan er sú, að það eru fyrst og fremst þýzkir og franskir bankar, sem voru í hættu staddir vegna efnahagsástandsins í Grikklandi.

Evruríkin mega ekki verða útvalin yfirstétt innan ESB segja Pólverjar

Donald Tusk, forsætis­ráðherra Póllands hefur varað við því að til verði í Evrópu eins konar yfirstétt evrunnar og segir, að sameiginlegar aðgerðir Evrópu­ríkja vegna fjármálakreppunnar megi ekki takmarkast við aðildarríki evrunnar. Pólski forsætis­ráðherrann krafðist þess, að komið yrði fram við öll aðildarríki Evrópu­sambandsins sem jafningja.

Merkel og Sarkozy reka á eftir framkvæmda­stjórninni

Angela Merkel, kanslari Þýzkalands og Nicolas Sarkozy, forseti Frakklands skrifuðu framkvæmda­stjórn Evrópu­sambandsins bréf í fyrradag, þar sem þau hvöttu framkvæmda­stjórn Evrópu­sambandsins til þess að flýta aðgerðum til þess að koma á nýju regluverki um rekstur fjármálafyrirtækja og þar á meðal að banna sérstaka tegund af skortsölu, sem Þjóðverjar hafa þegar bannað.