Sunnudagurinn 15. ágúst 2010

Útflutningsbannið á korni til að koma í veg fyrir þjóð­félags­óeirðir í Rússlandi

Meginmarkmiðið með útflutningsbanninu, sem Rússar hafa sett á korn er að koma í veg fyrir of mikla hækkun á korni heima fyrir segir BBC í dag. Rússar borða brauð með nánast öllum mat og fordæmi eru fyrir því að mikil verðhækkun á brauði geti leitt til þjóð­félags­legs óróa og jafnvel óeirða. Nú bendir allt til að kornframleiðsla á þessu ári í Rússlandi standi ekki undir neyzlunni heima fyrir.

WSJ: hvort erum við að tala um þýzka evru eða gríska evru?

Evran styrkist ekki þrátt fyrir uppsveifluna í Þýzkalandi, segir Wall Street Journal nú um helgina og spyr hvers vegna það gerist ekki. Blaðið segir skýringuna þá að uppgangur Þýzkalands auki á vanda evrunnar og undirstriki muninn á milli sterkasta hlekks evruríkjanna og þess veikasta. Þetta eru ólík ríki segir WSJ með ólík skattakerfi en byggja á einni og sömu stefnu í peningamálum.