Sunnudagurinn 16. september 2012

Nýr formaður Danska Þjóðar­flokksins vill breytingar á innflytjendapólitík

Kristian Thuelsen Dahl, hefur nú tekið við af Piu Kjærsgaard, sem formaður Danska Þjóðar­flokksins. Í fyrstu ræðu sinni lagði hann áherzlu á að breyta þyrfti innflytjendapólitíkinni í Danmörku, Hann vill takmarka fjölda innflytjenda frá öðrum löndum en vestrænum og taka upp aftur svokallað punktakerfi.

Víðtækar mótmælagöngur í Madrid og Lissabon-krafa um þjóðar­atkvæða­greiðslu á Spáni um aðhaldsaðgerðir

Mikill fjöldi fólks kom saman til mótmælafundar í Madrid í gær til þess að mótmæla aðhaldsaðgerðum ríkis­stjórnar­innar. Fólk kom hvaðanæva að á Spáni til að taka þátt í mótmælunum. New York Times telur að tugir þúsunda hafi verið á götum borgarinnar. Mikill mannfjöldi mótmælti líka í Lissabon í Portúgal.

Darling: Það verður að auka eftirlit með starfi banka­stjóra Englandsbanka

Áform um að breikka starfssvið Englandsbanka valda því að Alistair Darling, fyrrverandi fjármála­ráðherra Breta telur nauðsynlegt að auka eftirlit með starfi Englandsbanka­stjóra.

Sunday Telegraph: Færri en 100 þorskar eldri en 13 ára í öllum Norðursjónum

Úrtak af lönduðum fiski í evrópskum höfnum bendir til þess að ekki einn einasti þorskur, eldri en 13 ára hafi veiðst í Norðursjó á síðasta ári. Þessar niðurstöður hafa vakið áhyggjur um stöðu þorsk­stofnsins á þessu svæði þar sem þorskurinn getur lifað í allt að 25 ár. Þetta bendi til hnignunar stofnsins. Frá þessu segir í Sunday Telegraph í dag.

ESB: Deilt um starfssvið sameiginlegs fjármála­eftirlits á ráðherrafundi á Kýpur

Harðar deilur urðu á fundi fjármála­ráðherra ESB-ríkjanna á fundi á Kýpur í gær vegna tillögu Michel Barnier, eins fulltrúa í framkvæmda­stjórn ESB um að sameiginlegt banka­eftirlit taki til starfa í janúar. Wolfgang Schauble, fjármála­ráðherra Þýzkalands, segir, að þessi áform séu ekki framkvæmanleg á þessum tíma.