Danmörk: Er stórnjósnari Stasi fundinn?-Fyrrverandi blaðamaður á Extrabladet

Er stórnjósnari Stasi, austur-þýzku leyniþjónustunnar í Danmörku fundinn? Berlingske Tidende gefur það til kynna í morgun og segir að um sé að ræða þjóðkunnan fyrrum blaðamann á Extrabladet, að nafni Per Michaelsen, sem nú er um sjötugt. Heimildir Berlingske er Politiken en Politiken og Extrabladet eru gefin út af sama útgáfufélagi.

Fyrir nokkru skýrði Evrópuvaktin frá því að danskur sagnfræðingur, Thomas Wegener Friis teldi sig hafa fundið sannanir fyrir starfsemi dansks stórnjósnara í þágu Stasi en gaf ekki upp nafnið. Nú segir Politiken að Wegener Friis hafi nefnt nafn Per Michaelsen við nokkra aðila.

Per Michaelsen hefur fengið frelsisverðlaun Venstre (stærsta stjórnmálaflokks Danmerkur skv. könnunum) og fjölda annarra viðurkenninga fyrir að fletta ofan af Dönum, sem störfuðu fyrir Stasi.

Í frétt Berlingske kemur fram, að það hafi þótt með ólíkindum hvernig Per Michelsen hafi getað afhjúpað nöfn og dulnefni danskra njósnara Stasi tveimur árum áður en skipuleg rannsókn hófst á skjölum Stasi.

Berlingske segir að Michaelsen hafi ekki brugðizt við uppljóstrunum Politiken. Hann hafi hins vegar annars staðar bent á, að hann hafi verið rekinn frá Austur-Þýzkalandi skv. sérstökum fyrirmælum Ulbrichts og yfirmaður öryggislögreglunnar þá hafi verið Honnecker, síðar leiðtogi kommúnistaflokksins. Hann hafi setið í fangelsi í Prag af því að hann hafði samband við talsmann Charta 77, Jiri Hajek, sem var utanríkisráðherra í ríkisstjórn Dubceks.

Hafi Politiken og Thomas Wegener Friis rétt fyrir sér hafa þær aðgerðir yfirvalda í Austur-Þýzkalandi og í Tékkóslóvakíu þeirra tíma augljóslega átt þátt í að styrkja stöðu Michaelsen, sem harðsnúins andkommúnista í augum umheimsins.

PS: Einn af lesendum Evrópuvaktarinnar spurði í morgun hvað liði ítarlegri rannsókn á starfsemi Stasi á Íslandi og hverjir hefðu verið þar að verki. Þetta er rétt athugasemd. Það er kominn tími til að upplýsa um hverjir hér voru á ferð umfram það, sem fram hefur komið.

SG