Barnaskapur í málefnum hælisleitenda getur hæglega komið stjórnvöldum í koll

Gjarnan er látið svo í fjölmiðlum og málflutningi þeirra sem helst taka til máls um málefni hælisleitenda eins og það ætti að vera stjórnvöldum og Íslendingum kappsmál að greiða götu þessa fólks og auðvelda því að setjast að hér á landi.

Því miður verður að segja þá sögu eins og hún er að margir sem hingað koma ætla sér að misnota mannréttindareglur sér í hag og hverfa héðan sem allra fyrst fái þeir réttarstöðu sem auðveldar þeim að komast til annarra landa. Á þennan hátt spilla þeir fyrir áliti á þeim hingað leita í raunverulegri neyð.

Hælisleitendur reyna stundum að smygla sér úr landi til dæmis með því að verða laumufarþegar með skipum og nú í dag berast fréttir um að tveir Alsírmenn sem komu hingað til lands eftir að hafa eyðilagt vegabréf sín og logið til um aldur sinn hafi reynt að laumast úr landi með því að smygla sér inn á öryggissvæði á Keflavíkurflugvelli og þaðan inn í flugvél Icelandair sem var að leggja af stað til Kaupmannahafnar.

Ekki hefur verið greint frá því hvernig mönnunum tókst að laumast um borð í vélina. Að slíkt skuli hægt er áfall fyrir þá sem gæta öryggis á flugvellinum og hlýtur að kalla á sjálfstæða rannsókn. Allir venjulegir farþegar verða að fara í gegnum öryggishlið og síðan sæta skoðun farseðla áður en gengið er um borð í flugvél. Þá gilda reglur um öryggisvottun um þá sem starfa á flugvellinum í samræmi við alþjóðareglur. Atvik eins og það sem hér er lýst getur hæglega spillt áliti íslenskra yfirvalda í alþjóðlegu samstarfi. Isavia sem ber ábyrgð á þessim þætti í starfsemi Keflavíkurflugvallar verður að gera hreint fyrir sínum dyrum.

Ögmundur Jónasson innanríkisráðherra hefur í samræmi við stefnu vinstri-grænna gefið til kynna að hann sé og ætli sér að vera umburðarlyndari gagnvart hælisleitendum en forverar hans og nýlega kynnti Halla Gunnarsdóttir, aðstoðarmaður Ögmundar, skýrslu sem samin hefur verið undir hennar forsjá og öðrum þræði endurspeglar þessa stefnubreytingu vinstri-grænna í málefnum hælisleitenda.

Heimur hælisleitenda reynist oft allur annar þegar kafað er ofan í mál þeirra en fyrstu yfirlýsingar þeirra eða sjálfskipaðra málsvara þeirra gefa til kynna. Fyrsta neyðarkallið er gjarnan hið eina sem heyrist um mál þessa fólks í fjölmiðlum sem síðan taka til við að gefa til kynna að um harðræði sé að ræða sé neyðarkallið ekki tekið gott og gilt eða neitað að trúa því þegar fullorðnir menn segjast vera börn.

Barnaskapur í málum varðandi hælisleitendur kemur mönnum og ekki síst stjórnvöldum oft í koll. Því miður er pólitísk stjórn hælismála á Íslandi um þessar mundir í höndum fólks sem virðist hæglega stjórnast af slíkum barnaskap í þeirri trú að hann sé besta leiðin til að bæta heiminn.

Bj. Bj.