Verður EFSF látinn kaupa spænsk skulda­bréf á eftir­markaði?-Eða verður farið inn um bakdyr SE til að ná í peningana?

Þýzka dagblaðið Suddeutsche Zeitung, segir í dag að Evrópusambandið undirbúi nú að EFSF, hinn tímabundni neyðarsjóður ESB hefji kaup á spænskum ríkisskuldabréfum á eftirmarkaði til þess að ná niður lántökukostnaði Spánar. Fyrir hálfu ári var Seðlabanka Evrópu beitt með sama hætti til að ná niður vaxtakostnaði Spánar og tókst um hríð. Síðan hefur aðalbankastjóri þýzka Bundesbank ítrekað sagt að þau kaup SE verði ekki endurtekin.

Der Spiegel fjallar um þessa frétt dagblaðsins í dag og telur að Luis de Guindos, sem ýmist er kallaður efnahagsráðherra Spánar eða fjármálaráðherra í fréttum hafi hvatt til slíkra aðgerða í heimsókn sinni til Berlínar á þriðjudag og til Parísar í gær.

Aðstoðin við spænsku bankana, sem gefið hefur verið fyrirheit um er forsenda þess að hægt sé að beita EFSF með þessum hætti. Spiegel hefur heimildir fyrir því í Berlín að þýzk stjórnvöld séu ekki andvíg slíkum aðgerðum.

Lántökukostnaður Spánar hefur hækkað jafnt og þétt á tæpu ári. Evrópusambandið hefur með reglulegu millibili gripið til alls konar aðgerða til að lækka hann á ný og náð tímabundnum árangri en vandinn hefur alltaf farið í sama farveg aftur.

Í spænska dagblaðinu El Pais eru hins vegar vangaveltur í dag um, að ESM, hinn varanlegi neyðarsjóður ESB fái bankaleyfi, sem þýðir að sjóðurinn gæti tekið lán hjá Seðlabanka Evrópu og notað þá peninga til að kaupa spænsk skuldabréf og halda þar með niðri vöxtum.

Eftir er að sjá hvað Jens Weidman, aðalbankastjóri Bundesbank segir um að með þeim hætti verði farið bakdyrameginn inn í SE til þess að afla fjár til að bjarga Spáni.

SG