Bankia: 400 þúsundir litlir en reiðir hluthafar töpuðu öllu

Var lofað platinum kreditkortum ef þeir keyptu hluta­bréf

Eitt þeirra vandamála, sem við er að etja á Spáni er reiði um 400 þúsund venjulegra borgara, sem keyptu hlutabréf í Bankia (bankanum, sem varð til með sameiningu nokkurra sparisjóða) og töpuðu því fé öllu. Þeir telja sig hafa verið svikna og plataða. Þeir hafi ekki verið varaðir við hugsanlegum áhættum vegna þessara kaupa. Aðrir segja að það hafi verið ýtt verulega á þá um að kaupa hlutabréf á sama tíma og stofnana fjárfestar héldu að sér höndum.

Reuters fjallar um þessi mál í dag. Þar kemur fram að starfsmenn Bankia hafi hringt í þá, sem voru með reikninga hjá bankanum, jafnvel þrisvar til fjórum sinnum og þeir hvattir til að setja hluta sparnaðar síns í hlutabréf í bankanum. Þeim var sagt að ef þeir gerðu það þyrftu þeir ekki að greiða neina þóknun. Öðrum var sagt að ef þeir keyptu hlutabréf fengju þeir á móti platinum kredit kort. Enn öðrum var sagt, þegar tímabundinn sparnaður með tiltölulega háum vöxtum rann út að ekki væri hægt að endurnýja þá samninga en þeir hvattir til að nota peningana í að kaupa hlutabréf í bankanum.

Þessir litlu fjárfestar leggja sökina ekki á starfsmenn bankans, sem þeir segja að hafi líka keypt hlutabréf í honum. Bankinn segir að starfsmennirnir hafi ekki fengið þóknun fyrir sölu hlutabréfa til viðskiptavina.

Í umfjöllun Reuters kemur fram, að 90% stofnanafjárfesta á Spáni höfðu áhyggjur af þessu útboði og 20% vildu ekki líta við því.

Málið er nú í lögreglurannsókn. Eins og fram kemur í frétt hér á Evrópuvaktinni í dag segir Rato, fyrrverandi stjórnarformaður Bankia að hann hafi verið þvingaður til þess af ríkisstjórn sósíalista á Spáni og Seðlabanka Spánar að framkvæma útboðið.

SG