Steingrímur J. fær aðeins fylgi 26% af kjósendum á kjörskrá - einn í framboði - segir sigurinn „afgerandi“

Enn er þátttaka í forvali meðal vinstri-grænna (VG) álíka mikil og innan framhaldsskóla þar sem lítill áhugi er á stjórn nemendafélagsins. Alls voru 772 á kjörskrá í NA-kjördæmi sem nær frá Siglufirði til Hafnar í Hornafirði, kjördæmi sjálfs Steingríms J. Sigfússonar, formanns VG, aðeins 36% kusu eða 261. Steingrímur J. fékk 199 atkvæði eða 26% þeirra sem voru á kjörskrá.

Steingrímur J. Sigfússon

Steingrímur J. var einn í framboði í fyrsta sæti og er útkoma hans einfaldlega ömurleg hvernig sem á hana er litið. Hann segir á hinn bóginn við Vikudag á Akureyri laugardaginn 15. desember:

„Ég er fyrst og fremst þakklátur fyrir góðan stuðning við mig í forvalinu. Að vísu var ég sá eini sem sóttist eftir fyrsta sætinu, en stuðningurinn við mig er afgerandi.

Já, já, því miður var þátttakan ekki meiri, en ég bendi á að í prófkjörum og forvölum hjá öðrum flokkum hefur þátttakan almennt ekki verið mikil á undanförnum vikum.

Bjarkey [Gunnarsdóttir varþingmaður hlaut annað sætið] hefur verið virkur varaþingmaður og hún hefur auk þess tekið virkan þátt í starfsemi hreyfingarinnar á undanförnum árum. Bjarkey er öflugur stjórnmálamaður, þannig að ég fagna hennar góða árangri í forvalinu. Mér sýnist þetta vera sterkur listi og hlakka til að starfa með þessum góða hópi.“

Þessi ummæli Steingríms J. bera merki um einhvers konar firringu. Hvernig getur það verið „afgerandi“ stuðningur við flokksformann sem er einn í framboði að fá atkvæði 26% þeirra sem eru á kjörskrá? Hvar í heiminum annars staðar en innan VG gæti slíkt talist „afgerandi“ stuðningur?

Að skjóta sér undan hinni dapurlegu kjörsókn með vísan til annarra flokka og þátttöku í kosningum innan þeirra er fráleitt. Hér hefur verið vakin athygli á hve fáir sóttu kjörstað í forvali VG í Reykjavík þar sem hart var barist um 1. sætið þá kusu aðeins um 600 manns og um 400 í SV-kjördæmi þar sem aðeins 261 atkvæði dugði Ögmundi Jónassyni til sigurs.

Draumaframbjóðandi Steingríms J. í Reykjavík, Björn Valur Gíslason, hlaut hroðalega útreið og tangarsókn Steingríms J. gegn Ögmundi í SV-kjördæmi misheppnaðist.

Steingrímur J. grípur til leikbragða hins þaulvana stjórnmálamanns til að tala sig frá fylgisleysi sínu – tölurnar tala hins vegar sínu máli. VG er að verða að engu í höndum formannsins fylgislausa.

Bj. Bj.