Frakkar bíða með öndina í hálsinum eftir úrslitunum gegn Úkraínumönnum

Á sama tíma og Íslendingar keppa við Króata um sæti í heimsmeistarakeppninni í knattspyrnu í Zagreb heyja Frakkar baráttu við Úkraínumenn í París. Af frönskum fjölmiðlum má ráða að mikið sé í húfi, þjóðin glími við efnahagsvanda og kynþáttahatur láti á sér bera. Fari landsliðið halloka fyrir Úkraínumönnum verði ekki aðeins ráðist á leikmennina heldur vegið enn frekar að frönsku þjóðarstolti. Þess vegna sé ekki annað í húfi á leikvanginum en að „duga eða drepast“. Raunar er sagt að Frakkar þurfi á „kraftaverki“ að halda til að komast til Brasilíu á næsta ári.

Frakkar verða þriggja marka sigur til að komast áfram eftir að hafa tapað 2:0 í Kænugarði föstudaginn 15. nóvember. Frakkar kalla lið sitt Les Bleus hina bláu og eftir útreiðina í síðustu viku sættu leikmennirnir enn meiri skömmum en venjulega í fjölmiðlum og meðal almennings. Mistakist þeim að rétta hlut sinn í leiknum í París verður tekið enn fastar á þeim á opinberum vettvangi.

Í síðustu heimsmeistarakeppni féllu Frakkar úr leik í fyrstu umferð eftir uppreisn meðal leikmanna. Falli liðið nú úr leik verður þjóðin lengi að fyrirgefa því.

„Landsliðið er einskonar spegill þjóðfélagsins,“ segir Pascal Boniface, forstjóri hugveitunnar IRIS í París. „Þegar því vegnar vel eru allir sælir og glaðir, dálítið áhugasamari. Gangi þeim illa er litið á það sem enn eitt dæmið um að hnignun þjóðarinnar.“

Framganga landsliðsins hefur einnig áhrif á viðhorf Frakka í kynþáttamálum. Þegar liðið skipað liðsmönnum af mörgum kynþáttum sigraði á heimavelli í heimsmeistarakeppninni árið 1998 undir forystu Zinedines Zidanes var litið á hátíðahöldin sem á eftir fylgdu sem tákn um að spenna á milli kynþátta væri úr sögunni í landinu og nýir fjölmenningartímar hefðu hafist.

Þegar illa fór árið 2010 beindist óvild hins vegar í garð tveggja blökkumanna í landsliðinu og sambærilegur tónn setur enn svip sinn á umræður um liðið. Jean-Marie Le Pen, stofnandi Þjóðfylkingarinnar í Frakklandi, hefur lengi ýtt undir grunsemdir í garð leikmanna úr fjölskyldum innflytjenda í liðinu. Þá hafa sumir þjálfarar innan Knattspyrnusambands Frakklands viljað takmarka fjölda svartra leikmanna og araba í yngri liðum til að tryggja sem flesta liðsmenn í landsliðinu þegar fram líða stundir.

Boniface segir að andstæðingar blökkumanna og araba í franska landsliðinu verði sigri hrósandi tapi Frakkar fyrir Úkraínumönnum, þeir muni líta á það sem sönnun fyrir réttmæti gagnrýni sinnar á val manna í landsliðið.

Bj. Bj.