Miliband sakar Cameron um að beita leikbragði til að minnka völd Verkamanna­flokksins

Ed Miliband, leiðtogi breska Verkamannaflokksins, hefur hafnað tillögu Davids Camerons forsætisráðherra um að komið skuli í veg fyrir að þingmenn úr kjördæmum í Skotlandi greiði atkvæði um málefni sem snerta England sérstaklega á breska þinginu. Hann segist ekki styðja hugmyndina sem lýst er með orðunum: „Englendingar greiði atkvæði um lög á Englandi“.

Ed Miliband

David Cameron boðaði að morgni föstudags 19. september að heimastjórn Skota yrði aukin en samhliða yrði hugað að sérstöðu laga fyrir England á breska þinginu. Kynnti hann tímasetta áætlun um hvernig staðið yrði að málum varðandi Skotland og vildi með því stuðla að sáttum eftir að sjálfstæði Skotlands var hafnað í þjóðaratkvæðagreiðslu mánudaginn 18. september.

Undir lok baráttunnar fyrir þjóðaratkvæðagreiðsluna birtu leiðtogar þriggja stóru flokkanna á breska þinginu heitstrengingu á forsíðu skoska blaðsins Daily Recorder þar sem þeir lofuðu að skoska þingið í Edinborg fengi aukin völd í skattamálum, ríkisfjármálum og velferðarmálum höfnuðu Skotar sjálfstæði.

Miliband segir að yfirlýsing Camerons um að komið verði í veg fyrir að þingmenn frá Skotlandi hafi atkvæðisrétt um lög á Englandi sé „pólitískt leikbragð“ sem ætlað sé að koma í veg fyrir að Miliband og flokkur hans geti náð meirihluta vegna þess hve margir þingmenn kjörnir í Skotlandi styðja Verkamannaflokkinn.

Í Andrew Marr-þættinum á BBC sunnudaginn 21. september sagðist Miliband tilbúinn að veita þingmönnum frá Englandi „meiri hlutdeild“ í lagasetningu fyrir England. Þegar Miliband var spurður nánar um afstöðu sína til þess að þingmenn frá Englandi greiddu einir atkvæði um lög fyrir England sagði hann aðeins:

„Við munum skoða allar tillögur sem verða kynntar. Það er ekki til neitt einfalt svar við þessari spurningu. Um þetta vil ég segja að ég útiloka ekki aukna hlutdeild þingmanna frá Englandi í lagasetningu. Við getum þó ekki látið nægja að hripa eitthvað um þetta aftan á umslag….“

Miliband sagði að hann mundi standa við loforðið sem hefði verið Skotum fyrir atkvæðagreiðsluna. Stjórnskipunarmálið yrði hins vegar að skoða sérstaklega og ekki afgreiða það með hraði heldur setja niður nefnd sem skoðaði allar hliðar málsins í samræmi við mikilvægi þess.

Bj. Bj.