Frakkland: Tillaga um lágmarksþyngd sýningarstúlkna felld í þing­nefnd

Franska þingið hefur fellt tillögu um að lögbinda lágmarksþyngd sýningarstúlkna. Þingmaður sósíalista, Olivier Véran, taugasérfræðingur, flutti tillöguna til breytinga á frumvarpi um ný heilbrigðislög.

Marisol Touraine heilbrigðisráðherra studdi breytingartillöguna. „Ég tel að sýningarstúlkur eigi að borða vel og hugsa um heilsuna. Þetta eru brýn skilaboð til ungra kvenna sem líta til þessara stúlkna sem fyrirmynda um fegurð og glæsileika,“ sagði ráðherrann í sjónvarpssamtali.

Verán lagði einnig til að lögfest yrði bann við því að „dásama átröskun (anorexiu)“, einkum á netinu.

Báðar tillögur Veráns voru hins vegar felldar í nefnd sem fjallaði um frumvarpið með þeim rökum að yrðu horaðar sýningarstúlkur settar í bann mundi það leiða til mismununar við ráðningu þeirra til starfa.

Í tillögu Veráns fólst að umboðsskrifstofur sýningarstúlkna yrðu skyldaðar til að leggja fram læknisvottorð um að umbjóðendur þeirra stæðust ákveðnar kröfur um líkamsþyngd. Yrði ekki orðið við þessari kröfu mætti sekta viðkomandi um allt að 80.000 evrum.

Eftir að tillögunum hafði verið hafnað hét Verán því að halda baráttunni áfram. „Við gefumst ekki upp!“ sagði hann við dagblaðið Le Parisien. Hann ætlaði ekki að láta við það sitja að þingnefnd hafnaði því að taka þetta í frumvarpið heldur mundi hann taka málið upp í þingsalnum sjálfum.

Þingmaðurinn vill að Frakkar skipi sér að þessu leyti á bekk með þjóðum eins og Spánverjum, Ítölum, Belgum, Sílebúum og Ísraelum. Hjá þessum þjóöum hafa verið samþykkt lög til að sporna gegn dýrkun á átröskun. Hann segir að allt að 40.000 Frakkar þjáist af átröskun, um 90% á uppvaxtarskeiði.

Bj. Bj.