Pútín: Vesturlönd reyna að þrengja að Rússum og ýta undir óróa innanlands

Segir NATÓ byggja upp hernaðarkerfi í námunda við landamæri Rússlands

Vladimír Pútín

Vladimir Pútín, forseti Rússlands, flutti ræðu í gær á fundi rússnesku leyniþjónustunnar (FSB), þar sem hann sagði að Vesturlönd væru að þrengja að Rússlandi og ýta undir óróa innanlands. Hann sagði að þau notuðu allt vopnabúr sitt til að halda Rússlandi í skefjum. Þar kæmi til viðleitni til að einangra Rússa pólitískt, efnahagslegur þrýstingur, meiri háttar upplýsingastríð og sérstakar aðgerðir.

Þá sagði Pútín Atlantshafsbandalagið byggja upp hernaðarkerfi sitt í námunda við landamæri Rússlands og sagði að áform bandalagsins um eldflaugavarnir væru tilraun til að raska núverandi jafnstöðu á sviði kjarnorkuvopna.

Pútín sagði að staðan mundi ekki batna ef Rússar gæfu eftir. Hún mundi versna. Hún batni einungis með auknum styrkleika Rússa.

Þá sagði Pútín leyniþjónustur Vesturlanda halda áfram að nota félagasamtök og pólitísk samtök til að gera lítið úr stjórnvöldum í Rússlandi og skapa ójafnvægi innanlands. Hann sagði starfsemi gagnnjósnadeildar Rússlands hafa leitt til þess að starfsemi á þriðja hundrað undirróðursmanna hefði verið stöðvuð á síðasta ári.

Forsetinn sagði að Rússar mundu halda áfram að fylgjast með félagasamtökum sem væru fjármögnuð erlendis frá.

Talsmaður rússneska utanríkisráðuneytisins í Moskvu, Alexander Lukashevich, hafði í gær í hótunum við þau aðildarríki Atlantshafsbandalagsins, sem taka þátt í hinum nýju eldflaugavörnum en áður hafði sendiherra Rússa í Danmörku haft í slíkum hótunum við Dani eins og sagt hefur verið frá hér á Evrópuvaktinni.

Jens Stoltenberg, framkvæmdastjóri Atlantshafsbandalagsins sagði í Washington í fyrradag, miðvikudag,að bandalagið stæði nú fyrir mestu endurnýjun sameiginlegra varna frá lokum kalda stríðsins.

SG