Undarlegt ferðalag evrunnar til Berlínar og þaðan til Sviss og þaðan í Rabobanka í Hollandi!

Mattes

Stjórnmála- og efnahagsástandið í Evrópu hefur leitt af sér undarlega vegferð peninganna. Undanfarnar vikur hafa birtzt fréttir í evrópskum blöðum þess efnis, að evrur hafi streymt með vaxandi hraða úr bönkum í Grikklandi og á Spáni og aðallega leitað í þýzk ríkisskuldabréf með þeim árangri að Þjóðverjar borga nú nánast ekkert í vexti af ríkisskuldum, en að einhverju leyti til Sviss. Nú að undanförnu segir Financial Times hins vegar að peningarnir leiti í vaxandi mæli til Sviss eftir því sem fjárfestar hafi vaknað upp við að kannski væru þeir ekki öruggir með peningana sína í þýzkum skuldabréfum. Hvað gerist ef Þjóðverjar taka upp þýzka markið á ný?!

Glöggir greinendur sjá, að peningarnir hafa breytt um stefnu og flæða nú til Sviss. Hvað gerist þá? Svisslendingar hafa sett upp gólf. Hver evra skilar 1,20 svissneskum frönkum. Seðlabanki Sviss kaupir nú evrur í gríð og erg til þess að svissneski frankinn hækki ekki í verði. Í síðasta mánuði notaði bankinn 60 milljarða svissneskra franka í því skyni og talið að nú þegar hafi hann notað 12 milljarða það sem af er þessum mánuði.

Hvað gerir Seðlabanki Sviss við allar þessar evrur? Hann leggur þær inn í Rabobanka í Hollandi (Moody's lækkaði lánshæfismat þess banka fyrir helgi) og hvað gerir Rabobanki við evrurnar? Hann kaupir fyrir þær skammtímaskuldabréf sem Holland gefur út. Ávöxtunarkrafan á tveggja ára hollenzk bréf hefur lækkað á sama tíma og hún hefur hækkað á skuldabréf annarra kjarnaríkja evrunnar. FT segir að þessi viðskipti Seðlabanka Sviss ráði nú ferðinni á skuldabréfamarkaði.

Að mati Financial Times (sem ætti að vita það) er erfitt að skilja sálarlíf fjárfesta. Blaðið telur að margir þeirra séu orðnir hræddir við þýzk skuldabréf. Í byrjun mánaðarins var krafan á þau komin niður í 1,13%, hækkaði svo upp í 1,5% en er nú í 1,44%. Blaðið segir að kaupendur þýzkra skuldabréfa hafi ekki bara verið að kaupa sér tryggingu, þeir hafi líka gert sér vonir um að fá greitt til baka í þýzkum mörkum ef evran hryndi og innbyrða mikinn hagnað vegna hækkandi gengis marksins. Svo hafir þeir gert sér grein fyrir því að í þessu væri fólgin töluverð áhætta. Bæði væri dýrt að festa peningana í bréfum, sem skiluðum lágum vöxtum en að auki væri Þýzkalandi ekki skylt að endurmeta evrubréf sín og mundi nota tækifærið til að lækka skuldir sínar verulega.

Follow the money er sagt í glæpamyndum!

SG