Daily Mail eykur umsvif í netútgáfu á heimsvísu

Samsung neitar því að nýja spjaldtölvan líki eftir iPad.

Daily Mail er annað mest selda dagblað í Bretlandi (á eftir The Sun) og er upplag þess tæplega 2 milljónir eintaka. Blaðið á sér langa sögu, var stofnað 1896, og hefur á ákveðnum tímabilum haft mikil áhrif í brezku þjóðlífi. Það stendur mitt á milli gæðablaða á borð við Telegraph, Guardian og Financial Times og götublaða á borð við Sun og Mirror. Þegar stjórnmálaleiðtogar leita eftir stuðningi blaða í Bretlandi horfa þeir ekki sízt til Sun og Daily Mail.

En jafnframt hefur blaðið náð miklum árangri með netútgáfu sinni Mail Online, sem nú er mest notaða netútgáfa dagblaðs í Bandaríkjunum. Talið er að 2,3 milljónir manna fari inn á netútgáfuna í Bretlandi einu saman, daglega.

Mail Online hefur nú á að skipa um 70 starfsmönnum í London, New York og Los Angeles og hefur nú tilkynnt að skrifstofur verði opnaðar í Toronto í Kanada, Dehli á Indlandi og Sydney í Ástralíu. Mail Online er því bersýnilega að gera þessi enskumælandi svæði í heiminum að sínum heimamarkaði.

Þessi ákvörðun útgáfufélags Daily Mail undirstrikar þá nýju möguleika, sem netið opnar fyrir dagblöð.

Þegar horft er til okkar umhverfis er t.d. ljóst að lestæki á borð við Æpadda og önnur slík tæki opna möguleika fyrir blað eins og Morgunblaðið að ná betur til fólks á landsbyggðinni, sem hefur ekki kunnað því vel að fá blaðið seint sama dag eða nokkrum dögum síðar. Jafnframt er augljóst að miklir möguleikar felast í markaðssetningu gagnvart þeim 20-30 þúsund Íslendingum, sem búa í öðrum löndum í lengri eða skemmri tÍma.

Jafnframt er það áhugaverð spurning hvort Íslendingabyggðir vestan hafs gætu verið nýr markaður fyrir íslenzka fjölmiðla. Þótt þeim fækki, sem lesa íslenzku er þar fjöldi fólks, sem hefur áhuga á að fylgjast með íslenzkum málum. Þess vegna gætu fréttir á ensku frá Íslandi höfðað til fólks á þeim svæðum.

SG