Peugeot: Lækkun launa gæti leyst vandann

Mattes

Francois Hollande, Frakklandsforseti, stendur nú frammi fyrir fyrstu alvarlegu deilu á vinnumarkaði, sem ríkisstjórn hans þarf að takast á við. Bílasala í Evrópu hefur minnkað jafnt og þétt í fjögur ár samfellt. Við Íslendingar skiljum það mæta vel. Bílar seljast ekki í erfiðu árferði. Slíkt árferði hefur ríkt um allan suðurhluta Evrópu undanfarin ár.

Og vegna þess, að bílar seljast ekki þurfa bílasmiðjurnar hvorki á að halda þeim mörgu samsetningarverksmiðjum, sem þær hafa komið sér upp eða öllum þeim stafsmannafjölda, sem verið hefur á launaskrá. Þetta er tiltölulega skýrt og einfalt. Þetta er ástæðan fyrir því að Peugeot-bílasmiðjurnar hafa sagt upp 6500-8000 starfsmönnum.

Hollande hefur brugðizt við með því að skamma bílasmiðjurnar fyrir þessar uppsagnir. Vandinn er sá, að þær skammir duga ekki til að tryggja það fé, sem þarf til að borga þessum starfsmönnum laun.

Hins vegar bendir forstjóri Peugeot á, að laun séu um 14% hærri í Frakklandi en í Þýzkalandi. Ef það er rétt- og ástæða til að taka þessum tölum með fyrirvara vegna þess að Frakklandsforseti segir bílasmiðjurnar ljúga til um ástæður uppsagna-, en ef það er rétt er ljóst að Frakkar eiga erfiðara verk fyrir höndum en hingað til hefur verið talið. Það mundi skv. þessu spara Peugeot mikla peninga ef framleiðslan yrði flutt yfir landamærin til Þýzkalands.

Þessi þrýstingur á að lækka launakjör í sumum evrulöndum til þess að jafna samkeppnisstöðu þeirra við önnur evrulönd er að verða mjög áberandi í evrulöndunum. Fyrir skömmu birtust fréttir um að í Grikklandi væru uppi kröfur um slíka launalækkun í einkageiranum. Á Spáni er verið að lækka laun í opinbera geiranum og ekki ólíklegt að hið sama eigi eftir að koma upp í einkarekstri þar.

Þetta er það umhverfi sem forysta ASÍ telur svo eftirsóknarvert fyrir íslenzka launþega.

Af hverju?

SG