Nýju lífi blásið í deilur ESB og Frakka vegna Sígauna

Franski blaðamaðurinn Jean Quatremer, sem skrifar fyrir La Liberation frá Brussel og heldur útí vefsíðunni Coulisses de Bruxelle, UE, blæs á vefsíðu sinni laugardaginn 25. september nýju lífi í umræðurnar um árás Viviane Reding, dómsmálastjóra ESB, á Frakka vegna brottflutnings Sígauna frá Frakklandi.

Viviane Reding

Jean Quatremer segir, að á blaðamannafundi 14. september hafi Reding gagnrýnt Frakka harðlega en hann hafi þó talið ræðu hennar á ensku innan hóflegra marka. Hann bendir hins vegar á, að þetta hafi ekki verið hið eina, sem hún hafi haft um málið að segja við fjölmiðla þennan dag, því að hún hafi talað á frönsku á belgísku sjónvarpsstöðinni RTBF. Orð henna þar skýri vafalaust reiði Nicolas Sarkozys og stuðningsmanna hans í garð Reding. Þetta viðtal við dómsmálastjórann hafi algjörlega farið fram hjá öðrum fjölmiðlamönnum og þar á meðal Quatremer sjáfum. Hann telur það skaða, því að þar sé að finna skýringuna á deilunum milli Frakka og embættismanna í Brussel.

Quatremer birtir þetta fréttaviðtal við Reding, þar sem hún segir: „Við eigum vondar minningar um brottflutning í síðari heimsstyrjöldinni, hefjist þær aftur, jafngildir það endalokum Evrópu. Ég segi nei við slíku og berst gegn því í varðstöðu minni um sáttmálana!“ Quatremer segist stórundarlegt að hlusta á þessa fíflalegu yfirlýsingu. Að bera brottvísun Sígauna til lýðræðisríkis innan Evrópusambandsins saman við útrýmingu gyðinga og Sígauna sé algjörlega út í hött.

Hann segir, að ræða Reding á blaðamannafundinum hafi verið mun hófsamari, þegar hún sagði: „Mér var sjálfri brugðið vegna þess að aðstæður gáfu til kynna, að fólk væri flutt á brott frá einu aðildarríki aðeins vegna þess að það tilheyrði ákveðnum þjóðernislegum minnihluta. Ég taldi, að í Evrópu yrðum við aldrei aftur vitni að slíku ástandi eftir síðari heimsstyrjöldina.“ Með öðrum orðum, segir Quatremer, þá gagnrýni hún kynþáttafordóma en ekki „brottflutning“. Hún forðist með öðrum orðum allan samanburð við nasisma.

Ráðgjafar Sarkozy hafi lagt fyrir hann allt, sem Reding sagði um máið, áður en forsetinn hélt til leiðtogaráðsfundar í Brussel 16. september. Forsetinn hafi verið betur að sér en blaðamennirnir, sem undruðust, hve reiður hann var vegna samanburðar við Reding voðaverk nasista. Pistli sínum lýkur Quatremer með því að krefjast þess, að Reding biðjist afsökunar á orðum sínum í RTBF-sjónvarpsstöðinni. Hann segist einnig skilja betur en áður, hvers vegna dómsmálastjórinn hafi neitað að ræða við alla fjölmiðlamenn eftir 14. september.