Tölvuhernaður skilgreindur meðal helstu ógna gegn Bretum

Í skýrslu um nýja öryggis- og varnarmálastefnu Breta segir, að þjóðin sé að stíga inn „tíma óvissu“ og standi frammi fyrir „annars konar og flóknari ógnvöldum úr ótal áttum“ en áður.

„Í kalda stríðinu blasti við okkur tilvistarógn frá andstæðu ríki og mátti gera sér viðunandi grein fyrir hernaðar- og kjarnorkumætti þess. Okkur er ekki lengur ógnað á svo fyrirsjáanlegan hátt,“ segir í skýrslunni. Þar er einnig lögð áhersla á nauðsyn þess að greina váboða og snúast gegn þeim, áður en þeir breytast í átök eða hættuástand.

Al-kaída er nefnt til sögunnar sem „helsta ógn við þjóðaröryggi á líðandi stundu“. Í skýrslunni er bent á, að annars konar hugmyndafræði kunni að vaxa ásmegin og geta af sér ofbeldishópa meðal innflytjenda til Bretlands.

„Fyrir því má færa sterk rök, að á næstu tíu árum breytist öfgafullir áhangendur nýrrar hugmyndafræði eða kenningakerfis úr áróðursmönnum í hryðjuverkamenn.“

Í skýrslunni er í fyrsta sinn stigið það skref, að skipta hættum, sem steðja að Bretlandi í þrjá flokka:

Meginhættur sem steðja að Bretlandi eru alþjóðleg hryðjuverk, írsk hryðjuverk, tölvuhernaður gegn stoðkerfum samfélagsins, hernaðarátök milli ríkja, meiriháttar slys eða náttúruhamfarir, þar á meðal flensufaraldur.

Í næsta hættuflokki er árás á Bretland með efna-, lífefna- geisla- eða kjarnorkuvopnum; uppreisn eða borgarastríð utan Bretlands sem skapar aðstæður, sem hryðjuverkamenn geta nýtt sér; skipulögð glæpastarfsemi og hrun fjarskipta með árás annars ríkis á gervitungl.

Í þriðja hættuflokknum er hefðbundin hernaðarárás annars ríkis á Bretland; árás á verndarsvæði Breta erlendis; hefðbundin hernaðarárás á annað ESB- eða NATO-ríki; umtalsverð fjölgun hryðjuverkamanna, skipulagðra glæpamanna, ólöglegra innflytjenda og ólögmæts innflutnings til Bretlands; losun geislavirks efnis frá borgaralegri kjarnorkustöð; truflun á olíu- og gasflutningum og tímabundin truflun á innflutningi frá öðrum löndum.