Jóhanna segir vinstri-græna segja ósatt um hlut hennar að ESB-atkvæða­greiðslu

Jóhanna Sigurðardóttir.

Jóhanna Sigurðardóttir, forsætisráðherra, hafnaði því á alþingi fimmtudaginn 3. febrúar sem ósannindum að hún hefði beitt sér á þingi 16. júlí 2009 á þann veg við atkvæðagreiðslu um aðildarumsókn að Evrópusambandinu að segja við þingmenn úr röðum vinstri-grænna að stjórnarsamstarf Samfylkingar og vinstri-grænna mundi springa í loft upp ef þeir greiddu ekki atkvæði með tillögu um tvöfalda þjóðaratkvæðagreiðslu vegna ESB-umsóknarinnar. Hún sagði aðildarferlið ganga samkvæmt áætlun í samstarfi ríkisstjórnar við utanríkismálanefnd alþingis og á vettvangi ríkisstjórnarinnar í sérstakri ESB-nefnd ráðherra. Ríkisstjórnin mundi sjá til þess að ferlinu lyki.

Þetta kom fram þegar forsætisráðherra svaraði óundirbúinni fyrirspurn frá Einari K. Guðfinnssyni, þingmanni Sjálfstæðisflokksins, sem sagði ESB-viðræðurnar „skrípaleik“ á vegum klofinnar ríkisstjórnar, þar sem helmingur ráðherra væri á móti aðild.

Jóhanna sagði það „fullkomnar getgátur og rangt“ að um „skrykkjótt ferðalag“ inn í ESB væri að ræða. Einar K. sakaði forsætisráðherra um að draga upp „glansmynd“ af stöðu málsins innan stjórnarflokkanna og gera stjórnarþingmenn í vinstri-grænum að ósannindamönnum með því að hafna fullyrðingum um að hún hefði beitt þingmenn þrýstingi við atkvæðagreiðsluna 16. júlí 2009.

Einar K. Guðfinnsson vitnaði meðal annars í Ásmund Einar Daðason, þingmann vinstri grænna, sem sagði á þing fyrr í vetur:

,,Daginn sem atkvæðagreiðslan var í þinginu þá var enginn annar en hæstvirtur forsætisráðherra sem sat hér og kallaði hvern þingmann Vinstri grænna á fætur öðrum inn á teppið til sín og sagði þeim hinum sömu að ef þeir samþykktu það að fram færi tvöföld þjóðaratkvæðagreiðsla og það yrði samþykkt þá væri fyrsta vinstristjórnin sprungin.„