ESA vill meira gagnsæi í samkeppnisrekstri á vegum RÚV

Eftirlitsstofnun EFTA (ESA) krefst þess af íslenskum stjórnvöldum að gagnsæi í opinberum framlögum til ríkisútvarpsins (RÚV) verði aukið fyrir lok mars 2011 til að „draga úr hættu á samkeppnisröskun á þeim markaði“ þar sem RÚV starfar. Þetta kemur fram í athugasemdum ESA við fjármögnun og starfsemi RÚV sem birt er á vefsíðu stofnunarinnar 10. febrúar.

ESA segir, að í raun þýði athugasemdirnar að fyrirkomulagi á fjármögnun RÚV verði breytt til samræmis við viðmiðunarreglur ESA um ríkisstyrki til aðila sem sjá um almannaútvarp.

Í tilkynningu ESA segir að tillögur stofnunarinnar feli í sér að skilið verði á milli starfsemi RÚV sem telst almannaútvarp og þeirra þátta í starfi RÚV sem lúta skuli lögmálum markaðarins.

Á meðal þess sem ESA vill að gert verði er að RÚV skýri hvaða ný þjónusta á þess vegum lúti reglum um almannaútvarp, það er sé ekki í samkeppni á markaði. Þá verði sett skýr gjaldskrá um greiðslu fyrir þjónustu RÚV sem fellur undir hlutverk þess sem almannaútvarps, svo sem vegna aðgangs að gagnasafni RÚV. Settar verði skýrar reglur um það hvernig farið verði með hugsanlegar ofgreiðslur til RÚV. Þess sé gætt að öll markaðslæg starfsemi RÚV, það er starfsemi sem ekki fellur undir þjónustu almannaútvarps, sé í samræmi við viðmunarreglur ESA um útvarpsrekstur.

Í tilkynningu ESA segir að stofnunin hafi rætt við íslensk yfirvöld um þessar athugasemdir í tengslum við meðferð þessa máls. Ísland hafi nú þegar innleitt ákveðnar breytingar í kjölfar athugasemda ESA. Sem dæmi megi nefna að eignarhaldi á RÚV hafi verið breytt og fært frá mennta- og menningarmálaráðuneytinu til fjármálaráðuneytisins. Með því hafi verið skilið á milli eignarhalds á RÚV og opinbers eftirlits með útsendingastarfsemi sem ætti að leiða til óháðara eftirlits með starfsemi RÚV.