Skíðakennarar innan ESB/EES búa sig undir sameiginleg starfsréttindi

Skíðakennarar innan ESB ætla sér að tryggja að framkvæmdastjórn ESB lækki ekki kröfur samkvæmt prófinu „Eurotest“ sem þegar hefur hlotið viðurkenningu í fimm löndum. Skíðakennsla er meðal þeirra starfsgreina sem framkvæmdastjórnin vill að falli undir nýja löggjöf um sameiginlega ESB/EES markaðinn.

Eins og málum er nú háttað njóta aðeins arkitektar og sex heilbrigðistéttir þess að réttindi þeirra eru sjálfkrafa viðurkennd á öllu ESB/EES svæðinu. Nú er unnið að því að skapa skipakennurum og nokkrum öðrum starfsgreinum sambærilega stöðu.

Fimm ríki, Austurríki, Bretland, Frakkland, Ítalía og Þýskaland tilheyra nú Eurotest en samkvæmt prófinu verða skíðakennarar til dæmis að geta farið á miklum hraða í svigi niður skíðabrekku. Þeir verða einnig að vera vel að sér um öryggisreglur vegna fjallaferða. Námið tekur fimm til sex ár.

Frakkland hefur mikið aðdráttarafl fyrir skíðakennara hvarvetna í Evrópu. Vilja Frakkar ekki að slegið verði af kröfum Eurotest.

Samkvæmt áformum framkvæmdastjórnar ESB er ætlunin að gefin verði starfsréttindaskírteini fyrir einstakar starfsgreinar. Þau eigi að staðfesta að eigandi skírteinisins hafi staðist kröfur sem gildi hvarvetna á ESB/EES-svæðinu.

Frakkar fagna skírteininu fyrir skíðakennara af því að þeir telja að þar með takist að halda lítt menntuðum skíðakennurum frá brekkunum. Keppni milli kennara í brekkunum hefur leitt til deilna um menntun og hæfni. Sé lögregla kölluð á vettvang þarf hún að sanna við núverandi aðstæður, að greitt hafi verið fyrir kennsluna. Skírteini um menntun auðveldar allt eftirlit að mati frönsku lögreglunnar.

Mattias Prinz, þýskur snjóbrettakennari, stefndi Frökkum fyrir ESB-dómstólinn með þeim rökum að það hefði átt að viðurkenna réttindi sín í frönsku Ölpunum. Dómur lét málið falla niður í júlí 2010 eftir að Frakkar samþykktu undanþágu fyrir Prinz.

Í Frakklandi verða snjóbrettakennarar einnig að hafa heimild til skíðakennslu. Í Þýskalandi og Bretlandi þurfa þessir skíðakennarar og snjóbrettakennarar ekki að standast sama prófið.

Ítalskir ESB-þingmenn hafa lýst áhyggjum yfir því að erlendir kennarar nái undirtökunum á ítölskum skíðastöðum. Á Ítalíu eru gerðar ólíkar kröfur til kennara eftir skíðastöðum.

Deilur um inntak krafna sem gerðar eru til einstakra starfsgreina hefta framkvæmd þjónustutilskipunar ESB, sem skiptir miklu fyrir sameiginlega markaðinn innan ESB/EES-svæðisins. Framkvæmdastjórn ESB segir að hreyfanleiki vinnuaflsins sé lífsnauðsynlegur til að stuðla að hagvexti.

Eins og áður segir njóta aðeins sjö starfsgreinar af 800 sem eru viðurkenndar í Evrópu þess að starfsréttindi eru viðurkennd alls staðar innan ESB/EES-svæðisins. Greinarnar eru: læknar, hjúkrunarfræðingar á almennu sviði, tannlæknar, dýralæknar, ljósmæður, lyfjafræðingar og arkitektar.