Þjóðaratkvæða­greiðsla á Írlandi um bankaskuldirnar?

ESB mun hafna kröfum Íra á þeirri forsendu að þær mundu leiða til „paník“ ástands á fjármálamörkuðum segir Sunday Telegraph

Sunday Telegraph segir í dag að stórfelld átök séu framundan á milli nýrrar ríkisstjórnar á Írlandi og Evrópusambandsins. Leiðtogar bæði Fine Gael og Verkamannaflokksins hafi lofað írskum kjósendum að þeir mundu endursemja við ESB um aðhaldsaðgerðir, sem eru Írum þungar í skauti og þvinga fjármálamarkaði til þess að taka á sig töp bankanna að hluta. Þessar kröfur muni Kenny, væntanlegur forsætisráðherra Írlands setja fram á fundi leiðtoga ESB-ríkja í Helsinki á föstudaginn kemur.

Blaðið segir hins vegar að hvorki leiðtogar ESB-ríkja né Seðlabanki Evrópu né Evrópusambandið sem slíkt muni fallast á nokkrar breytingar, sem máli skipti. Kenny verði sagt að vilji hann fá lægri vexti verði Írar að hækka skatta á fyrirtæki. Kenny verði líka sagt að ekki komi til greina að láta fjármálamarkaði axla eigin töp af írsku bönkunum vegna þess, að þá mundi grípa „panik“ um sig á alþjóðlegum fjármálamörkuðum, sem mundi ná til Þýzkalands og Frakklands og gera út af við evruna.

Evrópskur dipómat sagði í samtali við Sunday Telegraph að því hærra sem Írar hefðu um kröfur sínar þeim mun harðari yrði andstaðan við þær. Sami aðili sagði að það eina, sem sneri að Írum væri að framkvæma efni samningsins. Kjósendur á Írlandi ættu enga aðild að þessu máli, þótt þeim hefði verið sagt annað.

Í Sunday Telegraph kemur fram, að nái Kenny engum árangri megi búast við grasrótarhreyfingu til þess að knýja fram þjóðaratkvæðagreiðslu um bankaskuldirnar. Þá geti ríkisstjórnin komið til Brussel með afstöðu þjóðar, sem segi Nei.

Írskur kaupsýslumaður segir við blaðið: „Við höfum gísl, sem heitir evra. Evran er gjaldþrota. Eina spurningin er hvort það á að fórna Írlandi til þess að halda þessu Ponzi-kerfi gangandi.“