Króatískur rithöfundur: getum öll orðið skrímsl sem nauðga og drepa

Króatíski rithöfundurinn Slavenka Drakulic, sem leitast við að sýna fram á í bókum sínum að við getum öll orðið skrímsli, sem drepi og nauðgi ef við höfum völd til þess, sagði við þingmenn á Evrópuþinginu, að handtaka Ratko Mladic mundi ekki duga til að koma á sáttum á Balkanskaga. Atburðirnir þar hefðu ekki orðið til í grasrótinni heldur vegna vísvitandi ákvörðunar stjórnmálaleiðtoga á þessu svæði um að æsa upp þjóðernisöfga. Enn ættu þeir, sem borið hefðu ábyrgð á stjórn þessara ríkja á sínum tíma eftir að játa sök sína.

Slavenka Drakulic segir að fólkið á Balkanskaga lifi í Orwellskri veröld, þar sem talað sé tungum tveim. Annars vegar sé talað friðsamlega við Evrópusambandið, hins vegar sé talað í þjóðernisöfgakenndum tón heima fyrir. Hún kveðst vona að ESB takist að halda friðinn og alla vega að kveða niður þjóðernisöfgar.

Rithöfundurinn segir að rannsókn á æsku og uppruna stríðsglæpamanna leiði í ljós, að þeir séu fólk eins og „ég og þú“. Í umhverfi þeirra og fjölskyldulífi sé ekkert sérstakt að finna, sem skýri gerðir þeirra.

Hún bendir á að í eina tíð hafi Jorgen Haider, hinn austurríski stjórnmálamaður, sem nú er látinn, haft sérstöðu í Evrópu. Nú megi finna í öllum Evrópuríkjum sambærilega stjórnmálaflokka.

Evrópa er í vandræðum sagði Slavenka Drakulic. Frá þessu er sagt á euobserver.