Brezk skýrsla: Náttúran er milljarða virði

Náttúran er virði milljarða sterlingspunda fyrir Bretland, segir í nýrri skýrslu, sem BBC segir frá. Stofnun, sem heitie National Ecosystem Assessment (NEA) segir að í langan tíma hafi áherzlan verið á að framleiða meiri matvæli og annan varning, sem hafi haft skaðsamleg áhrif á náttúruna en í henni liggi falin auðæfi. Í skýrslunni kemur fram að um 30% af vistkerfi heimsins, sem fólk byggir á séu í hættu en um 20% í batnandi stöðu.

Á stríðsárunum hafi Bretar lagt áherzlu á aukna eigin framleiðslu á matvælum og öðrum vörum eins og timbri. Það hafi gengið vel en leitt til þess að nú sé minna skóglendi á Englandi en annars staðar í Evrópu og gengið hafi verið á fiskistofna. Eitt af vandamálunum sé að eingöngu efnisleg verðmæti séu verðlögð. Með því að leggja mat á önnur verðmæti sem ekki eru eins áþreifanleg, svo sem hreint loft, hreint vatn og flóðavarnir sé hægt að ná meira jafnvægi í verðmætamat.

Hið konunglega fuglaverndarfélag hefur fagnað þessari skýrslu og bent á að hingað til hafi hagvöxtur verið skoðaður í ljósi vergrar landsframleiðslu en máli skipti að taka tillit til raunverulegra verðmæta náttúrunnar.

Einn höfunda skýrslunnar segir ekki hægt að setja einhverja ákveðna tölu á verðmæti náttúrunnar. Án hennar værum við öll dauð svo að verðmæti hennar sé óendanlegt. Það sem máli skipti sé stefnubreyting. Græn svæði séu t.d. gífurlega verðmæt. Þau hafi áhrif á verðmæti húsa og andlega heilsu fólks.