Norski dómsmála­ráðherrann ber lof á lög­regluna - verjandi segir Breivik geðveikan

Knut Storberget, dómsmálaráðherra Noregs, segir við NTB-fréttastofuna að hann muni beita sér fyrir því að lögreglunni verði veitt aukið fé til að rannsaka spengjutilræðið og fjöldamorðin föstudaginn 22. júlí auk þess til að takast á við öryggisráðstafanir og annað sem nauðsynlegt sé eftir voðaverkin.

Knut Storberget, dómsmálaráðherra Noregs.

Dómsmálaráðherrann hitti yfirmenn lögreglunnar á fundi að morgni þriðjudags 26. júlí til að ræða framgang mála eftir atburðina 22. júlí. Lögreglan hefur sætt gagnrýni meðal annars vegna þess hve viðbragðstími hennar vegna skotárásarinnar í Úteyju var langur. Storberget telur enga ástæðu til að gagnrýna lögregluna.

„Ég er tilbúinn til að ræða allar hliðar á viðbrögðum lögreglunnar en frá mínum bæjardyrum séð hefur lögreglan tekið mjög vel á málinu. Lögreglan hefur einnig gefið viðhlítandi skýringar vegna þess sem sætt hefur gagnrýni,“ sagði dómsmálaráðherrann eftir fundinn.

Í norska blaðinu Aftenposten er minnt á gagnrýni á lögregluna vegna þess hve langan tíma tók fyrir hana senda menn í Úteyju. Þá hafi einnig verið spurt hvers vegna sérsveit lögreglunnar hefði ákveðið að aka og síðan bíða eftir „eigin bát“ til að komast út í eyjuna þar sem Breivik beindi skotvopnum sínum að unga fólkinu og drap það.

Johan Fredriksen hjá lögreglunni í Ósló sagði mánudaginn 25. júlí að það hefði tekið sinn tíma fyrir lögregluna að koma eigin þyrlu á loft vegna sumarleyfa og sparnaðar. Þá hefði þyrlan hvort sem er ekki getað flutt sérsveitina. Það hefði þurft að kalla á þyrlu frá hernum. Til þessa hafi ekki verið samþykkt að þyrla hefði aðsetur í Ósló sagði Fredriksen.

„Allt hefur sinn tíma og nú einbeitum við okkur að því að bjarga þeim sem urðu fyrir árás,“ sagði dómsmálaráðherrann.

„Lögreglan á miklar þakkir skildar frá allri norsku þjóðinni fyrir einstaka framgöngu hennar,“ sagði ráðherrann.

Anstein Gjengedal, lögreglustjóri í Ósló, fagnaði heimsókn ráðherrans, hún styrkti sig og samstarfsfólk sitt.

Verjandi segir Breivik geðveikan

Geir Lippestad lögfræðingur Anders Behrings Breiviks

Geir Lippestad, verjandi Anders Behrings Breiveiks, sem sakaður er um fjöldamorð í Noregi, segir að umbjóðandi sinn sé geðveikur. „Hann telur sig vera í stríði og þegar menn séu í stríði sé þeim leyfilegt að ganga fram á þennan hátt. Hann telur að heimurinn skilji ekki viðhorf sitt en muni gera það eftir 60 ár,“ segir Lippestad við erlendar fréttastofur.

Lögfræðingurinn segist hafa hitt skjólstæðing sinn þrisvar og varið mörgum klukkustundum með honum eftir að hann tók málið að sér.

„Allt bendir til þess að hann sé geðveikur. Hann er ekki eins og við hin.“

Lögfræðingurinn segir að Breivik sé undrandi á því að sér hafi tekist að myrða unga fólkið í Úteyju. Hann hafi búist við að verða handtekinn. Blaðið VG segir að hann hefði búist við að verða skotinn eftir sprengjutilræðið.

Breivik hefur sagt lögfræðingi sínum að í Noregi séu tvær sellur á sínu bandi og fleiri erlendis. Hann vill ekki upplýsa neitt frekar um þessar sellur en telur að þær undirbúi nýja árás.

Lippestad leggur áherslu á – eins og saksóknari – að það sé ekki á sínu færi að leggja mat á hvort Breivik sé í raun geðveikur, þar komi réttargeðlæknar til sögunnar. Breivik hefur verið úrskurðaður í átta vikna gæsluvarðhald þar af fjórar vikur í algjörri einangrun.