Bjartsýni eykst um hækkun lánsheimilda á Bandaríkjaþingi

Bandaríkjaþing býr sig undir að ljúka afgreiðslu á samkomulagi mill Bandaríkjaforseta og leiðtoga þingflokka um auknar lánsheimildir fyrir ríkissjóð Bandaríkjanna og koma í veg fyrir greiðslufall hans. Talið er að greidd verði atkvæði í fulltrúadeildinni mánudaginn 1. ágúst og í öldungadeildinn þriðjudaginn 2. ágúst.

Bandaríska þinghúsið

Samkvæmt samkomulaginu sem náðist sunnudaginn 31. júlí hækkar lánsheimildin um 2.400 milljarða dollara úr 14.300 milljörðum auk þess sem ætlunin er spara svipaða fjárhæð á næstu 10 árum með því að draga úr ríkisútgjöldum. Ný þingnefnd skipuð fulltrúum beggja flokka mun ákveða 1.500 þúsund milljarða niðurskurð af þessari fjárhæð.

Samþykkja þarf samkomulagið í báðum þingdeildum og er búist við að innan beggja þingflokka verði einstakir þingmenn á móti frumvarpinu. Forystumenn þingflokka vinna nú að því að fá nógu marga til að styðja málið svo að hljóti afgreiðslu í síðasta lagi 2. ágúst.

Joe Biden, varaforseti Bandaríkjanna, hitti forystumenn úr hópi þingmanna í hádegi mánudaginn 1. ágúst. Hann sagði fundinn hafa verið „góðan“ og hann væri „sannfærður“ um að frumvarpið yrði samþykkt.

Fyrstu viðbrögð á mörkuðunum við samkomulaginu voru jákvæð. Dow Jones kauphallarvísitalan í New York hækkaði um 1% eftir að viðskipti hófust. Það slaknaði his vegar á eftirspurn þegar leið á daginn vegna neikvæðra frétta af efnahagslífi Bandaríkjanna.

Helstu atriði samkomulagsins eru þessi:

• Lánsfjárheimild hækkar um 2.400 milljörðum og dugar hún fram yfir forsetakosningar 2012.
• Niðurskurður ríkisútgjalda um 900 milljarða dollara, skipt á milli varnarútgjalda og annarra útgjalda.
• Tveggja-flokka „yfir-þingnefnd“ gerir tillögu um 1.500 milljarða dollara sparnað á næstu 10 árum, tillaga liggi fyrir í nóvember 2011.
• Gripið verði sjálkrafa til niðurskurðar á meginútgjaldaliðum, þar á meðal í menntamálum og varnarmálum ef „yfir-þingnefndin“ nær ekki samkomulagi.

Niðurstöður nefndarinnar verða bornar undir þingið.

Að mati fréttaritara BBC í Washington er talið að mun ákafari umræður verði um málið í fulltrúadeildinni en öldungadeildinni. Repúblíkanar eru í meirihluta í fulltrúadeildinni og þeir í röðum þeirra sem hlutu kosningu í nóvember 2010 hafa helst staðið gegn málamiðlun um lánsheimildina, margir þeirra vilja meiri niðurskurð eða breytingu á stjórnarskrá Bandaríkjanna í þá veru að skylt sé að tryggja hallalaus fjárlög.

Í hópi demókrata eru margir andvígir tillögum um niðurskurð á félagslegum útgjöldum, sjúkratryggingum eða stuðningi við aldraða og láglaunafólk.

Í öldungadeildinni er meiri samhljómur á milli flokka en í fulltrúadeildinni. Harry Reid, leiðtogi demrókrata í öldungadeildinni, þar sem þeir hafa meirihluta, og Mitch McConnell, leiðtogi repúblíkana, knúðu á um að samkomulag tækist. Í öldungadeildinni þarf aukinn meirihluta, 60 þingmenn, til að frumvarpið hljóti samþykki.

Í fulltrúadeildinni sitja 435 þingmenn og þar nægja 240 atkvæði til að frumvarpið hljóti samþykki. Talið er að sumir repúblíkanar, þeir sem vilja sem minnst ríkisútgjöld, og fulltrúar Te-armsins innan flokksins muni greiða atkvæði gegn frumvarpinu. Frumvarpið verður því ekki samþykkt í deildinni nema demókratar leggi því líð.

Barack Obama Bandaríkjaforseti viðurkenndi í ræðu sunnudaginn 31. júlí að hann hefði viljað aðra niðurstöðu en mælt er fyrir um í samkomulaginu en mælti samt með framgangi þess.