Fjölmiðlar og fjármála­markaðir ganga út frá gjaldþroti Grikklands sem vísu

Í fréttum Sky sjónvarpsstöðvarinnar í Bretlandi í morgun, sunnudagsmorgun, var gengið út frá því sem vísu að Grikkland færi i gjaldþrot og í öðrum fréttum í morgun kom fram, að áherzlan innan evrusvæðisins sé ekki lengur á að bjarga Grikklandi heldur að bjarga bönkunum, sem munu tapa miklu fé á gjaldþroti Grikklands, ekki sízt frönskum bönkum.

Fréttaritari Sky í Aþenu segir, að athyglin þar beinist nú að fundi Evangelos Venizelos, fjármálaráðherra með Christine Lagarde, forstjóra AGS í dag. Timothy Geithner, fjármálaráðherra Bandaríkjanna hefur hvatt evrusvæðið til aðgerða og hið sama hafa talsmenn kínverskra og brasilískra stjórnvalda gert. Töluverðar umræður eru um eflingu neyðarsjóðs ESB, sem nú hefur yfir að ráða 400 milljörðum evra en Geithner hvatti til þess á fundi í Póllandi fyrir viku, að sjóðurinn yrði skuldsettur til þess að hafa meira fjárhagslegt bolmagn.

Daily Telegraph segir að þýzkir og franskir sérfræðingar hafi unnið að gerð áætlunar, sem snúizt um að byggja upp eins konar eldvegg í kringum Grikkland, Portúgal og Írland til þess að koma í veg fyrir að vandamál þeirra ríkja hafi áhrif á önnur evruríki. Jafnframt verði Grikkland gert kleift að afskrifa um 50% af skuldum sínum. Neyðarsjóður ESB verði skuldsettur þannig að hann hafi yfir að ráða tveimur trilljónum evra, en það fjármagn verði notað til þess að hjálpa ríkjunum innan eldveggjarins, bönkunum, sem tapa á þeim og jafnframt til að kaupa skuldabréf Ítalíu og Spánar, sem seljist ekki. Blaðið segir að þetta séu áþekkar hugmyndir og Geithner setti fram fyrir viku. Þeim var illa tekið þá ekki sízt af Þjóðverjum en nú hafi þeir brugðizt við vegna áframhaldandi sviptinga á fjármálamörkuðum.